سرینگر۔ 05 جنوری (اے پی پی) بھارت نا غیر کانودی کوزہ ٹی جموں و کشمیر اٹی سری نگر و وادی کشمیر نا ایلو علاقہ غاتیٹی پوسٹر خلنگانے ہرافتا کمک اٹ اقوام متحدہ غان خواست کننگانے کہ او 5 جنوری 1949 آ منظور کروک آ تینا قرارداد آتا رداٹ کشمیر نا جھیڑہ ءِ ایسر کرفے۔ کشمیر میڈیا سروس نا رداٹ پوسٹرآجوئی پسند تنظیم’’جموں وکشمیر وارثین شہدا، جموں کشمیر لبریشن الائنس، فلاح پارٹی، جموں وکشمیر جسٹس پارٹی، جموں وکشمیر ڈیموکریٹک موومنٹ، جموں وکشمیر پولیٹیکل ریزسٹنس موومنٹ، جموں کشمیر صدائے مظلوم و اسٹوڈنٹ و یوتھ فورم‘‘ خلکنو۔ پوسٹر آتیٹی رقم تحریر اٹی اقوام متحدہ غا زور شاغنگانے کہ او کشمیری تا حق خودارادیت نا خلاف ورزی نا نوٹس ءِ ہلے ہرادے جہانی برادری نا سلامتی کونسل 05 جنوری 1949 آ منظور کروک آ قرارداد آتا کمک اٹ امنا کرینے۔ پوسٹر آتیٹی پاننگانے کہ بی جے پی و آرایس ایس نا کماشی ٹی فسطائی بھارتی حکومت ظالمانہ کانود نا رداٹ کشمیری الس نا ڈغار، ہند، آسودہی و تعلیمی ادارہ غاتے ضبط واوفتا غٹ بنداوی حق آتے پُلنگ ءِ، او جہانی کہول آ امنا مروک جھیڑہ ئی علاقہ ٹی ہندوتوا نا ایجنڈا ءِ مون آ دننگ ءِ۔ پوسٹر آتے فیس بک و ٹویٹر آتون اوار راجی رابطہ غاتا ایلو سائٹ آتیا ہم اپ لوڈ کننگانے۔
