اومیت ءِ’’انٹرنیشنل کانفرنس آن کلائمیٹ ریزیلیئنٹ پاکستان‘‘ اٹی مہذب راج نوکاپ آن زہمی تا بحالی و پوسکن تفنگ اٹ پبی کمک کن مون آ بریک، وزیراعظم شہباز شریف

صحبت پور۔ 04 جنوری (اے پی پی) وزیراعظم محمد شہباز شریف اومیت ظاہر کرینے کہ 9 جنوری 2023 آ جنیوا ٹی مروک آ ’’انٹرنیشنل کانفرنس آن کلائمیٹ ریزیلیئنٹ پاکستان‘‘ اٹی مہذب راج نوکاپ آن زہمی تا بحالی و پوسکن تفنگ کن پبی کمک کن مون آ بریک، بلوچستان اٹی پوسکن آ آسراتی تیان آراستہ 12 دانش اسکول جوڑ کینہ، نوکاپ زہمی تے اُراتا معاوضہ نا ادائیگی کن غٹ وسیلہ غاتے کاریم اٹ اتینہ۔ چارشنبےنادے آ صحبت پور اٹی نوکاپ زہمی و ہندی سرکڑدہ غاتیان تران کرسا وزیراعظم پارے کہ اینو ننکن خوشی نادے اسے۔ مستین اٹ ہراتم داجاگہ نا دورہ ءِ کریٹ تو دا علاقہ دیر اٹی ڈبینگوک ئسک و داڑے کمکی گڑاتا سرکننگ آسان ءُ کاریم اس الوکہ۔ صوبائی حکومتی مشینری دے و نن کاریم کریرہ ولے چیلنج داخہ در بھلن ئسک کہ داوڑنا نوکاپ تینا مچ آ زنداٹی خنتنون۔ سندھ انا گیشتر علاقہ دیر اٹی ڈبینگوک ئسر۔ داحالیت آتے خنسا خوف بسکہ کہ ہراوڑ دا مخلوق تینا علاقہ ٹی بحال مریک۔ داڑتون اوار اوار حکومت پاکستان نا وسیلہ غاک کچ اٹ ئسر۔ ہراحالیت آتیٹی نن حکومت ءِ سنبھالاسن او بھاز مخدوش ئسر۔ آئی ایم ایف تون ننا معاہدہ پناسس۔ دنیا ٹی تیل انا نہاد آک آسمان تون ہیت کریرہ۔ تدوک آ حکومت نا نابودی نا سوب آن نن اڑزان گیس ہلنگ کتون۔ خولم نا پیدوار ننا طلب آن کم ئسک۔ داوخت آ ارب آ ڈالر نا خولم پیشن آن خواہفنگ اُن تانکہ پاکستان نا الس ءِ خولم ملنگ کے۔ وزیراعظم پارے کہ تیل آ پاکستان نا 27 ارب ڈالر خڑچ مس ہراتاریخ اٹی تیل آ مروک آ غٹ آن بھلا خڑچہ ئسک۔ اوپارے کہ داٹی ہچ ءُ شک اس اف کہ کبینی بھاز زیات ءِ ، داغٹ ویل آتون اوار اوار نوکاپ نا حالیت اٹی اسہ پین بھلو چیلنج اس مون آ بس ولے اللہ نا شکر ءِ کہ مخلوط حکومت نوکاپ زہمی تا تینا وس انا رداٹ خذمت کرے۔ صوبائی حکومت آک ہم تینا بشخ انا کڑد ءِ ادا کریر۔ بنجائی حکومت بینظیر انکم سپورٹ پروگرام آن 100 ارب روپئی آن زیات زہمی تیکن جتا کرے۔ 9 جنوری آ انٹرنیشنل کانفرنس اڈ ہلنگ ءِ ہراٹی اقوام متحدہ نا سروک آن بیدس نمائندہ غاک ہم بشخ ہلیرہ۔ داکانفرنس نا کماشی ءِ او تینٹ کیک وخت اس کہ دا چرجوئی ٹی چندی ملک آتا سروک آتون رابطہ غاتا چرجوئی برجاءِ کہ او داکانفرنس اٹی بشخ ہلیر تانکہ دنیا ءِ شہ ملے۔ وزیراعظم پارے کہ ملائیشیا نا پوسکن گچین مروک آ وزیراعظم تون فون آ ہیت مس تو اوٹی تینائی محسوس مس۔ او داوخت آ پاکستان ءِ تینا ارٹ میکو اُرا گوندا۔ اوہروڑنا امداد و پاکستان اٹی زرکاری نا عزم ظاہر کرے و زوم انا کمک اٹ دا انٹرنیشنل کانفرنس اٹی بشخ ہلنگ نا پارے انتئے کہ او بطور وزیر خزانہ بجٹ پیش کننگ ءِ۔ ہنداوڑ ترکی نا صدر، قطر انا امیر، متحدہ عرب امارات نا صدر تون ہیت کرین غٹ گرم جوشی نا درشانی ءِ کریر۔ وزیراعظم پارے کہ پاکستان ءِ تینا نت تیا سلفنگ کن ننے تینٹ قربانی و ایثار نا جوزہ غاتا درشانی ءِ کروئی مریک۔ اوپارے کہ ہرا دانش اسکول ہرا داڑے جوڑ مسنے اودے ہرسا بے حد خوشی مسنے۔ قائم مقام گورنر و وزیراعلیٰ بلوچستان و انتظامیہ داٹی بھاز است خواہی ہلکر۔ دااسکول نا تفنگ و مسن تے تعلیم دوئی کرسا خناٹ است باغ باغ مس۔ اسکول اٹی کمپیوٹر لیب اس ہم جوڑ کننگانے۔ سمارٹ بورڈ خلنگانے۔ دا آسراتی تے خنسا پنجاب نا دانش اسکول یات بس۔ پنجاب اٹی ہراتم دانش اسکول نا ڈٹ انا بناءِ کرین تو ہزگار آتا چناتیانبار مر مر انا نیزگار چناتے ہم تعلیم نا آسراتی نا فراوانی مسخت ئس۔ دا ملک اٹی لکھ آ چناتے عام تعلیم ہم دوئی اف، لکھ آ چناتیکن اسکول آتیٹی بنداوی آسراتی اف۔ دا چناتے اگہ قومی دنگ اٹ اوار کتون تو پاکستان ءِ جوڑ کننگ نا مسخت نا تغ پورو مننگ کپک۔ اوپارے کہ ایچی سن نا برعکس دا دانش اسکول نیزگار آتا چناتیکن جوڑ کننگانے۔ داوخت آ وزیراعظم رحیم یار خان نا دانش اسکول اٹی لمہ و باوہ ہڑتوم آتا سیخا آن محروم زیر تعلیم مسڑ عائشہ نا داستان ءِ بنفسا اوغوئی مس۔ وزیراعظم داوخت آ بلوچستان اٹی 12 دانش اسکول جوڑ کننگ نا پڑو کرے ہرا پنجاب اٹی جوڑ کروک دانش اسکول آنبار مریرہ۔ ہراڑے چناتے مفت تعلیم، اڈ کننگ وکن و خور نا آسراتی دوئی مریک۔ صوبائی حکومت دا اسکول آتیکن ڈغار فراوان کے۔ پنجاب نا دانش اسکول آتا چناک مچ آ دنیا ٹی شرہ ومقابلہ غاتیٹی بشخ ہلنگ ءُ۔ 2008 اٹی خلوک آ دانش اسکول نا دا نیال آن سد آ چناک انجینئر و ڈاکٹر جوڑ مسنو۔ صحبت پور اٹی دانش اسکول اٹی 23 مارچ اسکان ہاسٹل و ایلو آسراتی تے پورو کننگک ہرانا بناءِ 23 مارچ آ ہی کینہ۔ داٹی خالدمگسی و ایلو ہندی مخلوق نا ہم بھلو کڑد اسے۔ دادانش اسکول آتے شمسی توانائی آن بجلی فراوان کینہ۔ وزیراعظم پارے کہ دادانش اسکول پاکستان کن اسہ اہم ءُ کڑد اس ادا کیک۔ ہرانا روشنائی مچ آپاکستان ءِ روشنا کیک۔ وزیراعظم پارے کہ داڑے ہرا خواست آتے پیش کننگانے اوفتے پورو کینہ۔ اوپارے کہ نوکاپ زہمی تا بحالی نا کاریم داسکان برجاءِ۔ ہزار آ زہمیک داسہ ہم کمک نا چاری ءُ اوفتے کن انٹرنیشنل کانفرس اس اڈتننگ انگ ءِ۔ زہمی تے داسکان اُراتا معاوضہ تروئی ءِ۔ 10 لکھ اُرا بھس مسنو۔ داڑکن اللہ پاک اسباب ودی کیک۔ حکومت تینا فرض انا پوروی اسکان آرام اٹ تولپنہ۔ اوپارے کہ بنجائی حکومت ہرافنڈ آتے تسنے دا پاکستان اٹی رہینگوک آ ہر شاری نا حق ءِ۔ وسیلہ غاتیا اوفتا حق ءِ۔ وزیراعلیٰ بلوچستان و داجاگہ نا ایم این اے، قائم مقام گورنر و آفیسر آک ہراکوشست آتے کریر او ستاکڑزرہ۔ اوفتے ہراہدف ءِ تسن اودے اوفک 2 تُو اٹی پورو کریر۔ چیف سیکرٹری، سیکرٹری تعلیم بلوچستان و کمشنر کن تمغہ خذمت نا پڑو کرے ہرااوفتے 23 مارچ آ تننگک۔ ہرانا مسخت ایلو آفیسر آتے ہم ہندا وڑ اٹ خواری و لگن اٹ کاریم کننگ نا ترغیب تننگ ءِ تانکہ نن دا پاکستان نا تکمیل ءِ کننگ کین ہرانا تغ ءِ قائد اعظم خناسس و 23 مارچ 1940 آ پاکستان نا کونہ کونہ غان مخلوق داتغ ءِخناسر واونا قرارداد ءِ منظور کریسر ہرانا مسخت دائس کہ داڑے غٹ ءِ بریبر حق ملے نئے کہ امیر امیر تر و نیزگار نیزگار تر مرے۔ پاکستان داخاطران جوڑ مسوسس کہ داڑے رہینگوک آ ہر مذہب نا پیروکار ءِ بریبر حق ملے۔ ہندا ہمو وژن و تغ ءِ ہرا داسکان پورو مننگ کتنے۔ لکھ آ مسلمانک داڑکن دترنا دریاتے عبور کریر۔ داوخت آ قائم مقام گورنر جان محمد جمالی تیناعلاقہ ٹی دانش اسکول نا جوڑ کننگ کن مفت ڈغار نا فراوانی نا پڑو کرے۔ وزیراعظم ءِ نوکاپ زہمی تا بحالی و بھس مروک انفراسٹرکچر نا پوسکن تفنگ و بحالی نا بابت حوال ہم تننگا۔