اسلام آباد۔ 04 جنوری (اے پی پی) وزیراعظم محمد شہباز شریف پارینے کہ مچ آ ملک انا مدرسہ غاک اسلامی تعلیم آتا مون آ دننگ نا اہم ذریعہ ءُ، حکومت نااست خواہی ءِ کہ دا نیک راجی خذمت اٹی مدرسہ غاتا دوتے سبک کے، مدرسہ غاک پاکستانی و اسلامی این جی او تا بھلو نیٹ ورک اسے ءُ، مدرسہ غاتا تعلیمی و راجی خذمت آتیٹی عالم دین تا سلابت اٹ ہرممکن کمک کینہ، مفتی اعظم پاکستان رفیع عثمانی ایماندار نا دین اسلام کن خذمت آتا عالم اسلام معترف ءِ۔ داخیال آتا درشانی ءِ او اتحاد تنظیماتِ مدرسہ غاتا ڈل اتون گپ وتران کرسا کرے ہرافک چارشنبے نادے آ داڑے اوڑتون اوڑدہی کریر۔ اوڑدہی ٹی صدر جمعیت علماء اسلام مولانا فضل الرحمان ، مولانا مفتی محمد تقی عثمانی، مولانا محمد حنیف جالندھری، مولانا مفتی منیب الرحمان، صاحبزادہ عبدالمصطفیٰ ہزاروی، سینیٹر پروفیسر ساجد میر، مولانا عبدالمالک ، مولانا افضل حیدری، مولانا عبدالکبیر آزاد و مولانا فضل رحیم اشرفی آن بیدس ایلو جید علماتون اوار اوار بنجائی وزیر رانا تنویر حسین، مریم اورنگزیب ، رانا ثناء اللہ خان، مفتی عبدالشکور ، خصوصی کمکار سید فہد حسین و تعلقدار بڑزکو کمامدارآک بشخ ہلکر۔ ڈل وزیراعظم ءِ مدرسہ غاتے مون تروک ویل آتیان معلومدار کرے۔ وزیراعظم مدرسہ غاتا منتظم آتے باورکرفے کہ حکومت دا مدرسہ غاتا بست وبند آتا بابت اوفتے زیات آن زیات وتواجہی تننگ تون اوار اوار نئے بیرہ اوفتا رجسٹریشن نا وڑوڈول ءِ پین آسان بلکن دا مدرسہ غاتیٹی پوسکن آ دور انا خواست آتا رداٹ تعلیم نا فراوانی ٹی ہروڑنا کمک فراوان کیک۔ وزیراعظم داوخت آ پارے کہ اوڑکن جید عالم آتا ڈل اتون اوڑدہی ٹی خوشی و شرفمندی نا سوبءِ۔ وزیراعظم پارے کہ نما غٹ عالم دین تا ملک اٹی دینی بشخ انا تعلیم و تدریس کن خذمت ستاکڑزک۔ دینی مدرسہ غاتیٹی ملک انا چِل آن پنجا لکھ طالب علم مفت دینی تعلیم آن فیضیاب مننگ ءُ ہرافتے ٹی حفظ قرآن پاک ہم کرفنگک۔ وزیراعظم مستی پارے کہ مدرسہ غاک مدام پاکستان نا فائدہ غاتا رکھ ءِ کرینو۔
