کوئٹہ۔ 23مئی (اے پی پی) اسپیکر بلوچستان اسمبلی راحیلہ حمید خان درانی پارینے کہ نیاڑی نا شون آن بیدس ہچ ئُ قوم و ملک اس شون ہلنگ کپک، ایران اٹی نیاڑیک زند انا ہر بشخ اٹی نمان خذمت سرانجام تننگ ئِ ہراکہ نن کن مشعل راہ اسے، داہیت ئِ او دوشنبے آ کوئٹہ ٹی پاک ایران جوائنٹ چیمبر آف کامرس اینڈ انڈسٹری نا افتتاحی دود آن تران کرسا کرے۔ راحیلہ حمید خان درانی پارے کہ پاکستان و ایران اِر ابرادر اسلامی ملک ئُ گرج دا ہیت انا ئِ کہ واپار تون اوار اوار پارلیمانی باسک و ورناتا ڈل انا درشانی ئِ ہم شروع کننگے و ننے ایران نا دودوربیدہ تاریخ نا بابت کروک آ آزموندہ غاتیان فائدہ ہرفوئی مرے۔ اوپارے کہ ایران معاشی پابندی و مشکلات آتا باوجود بھاز شون ہلکونے وہڑتوم آ ہمسایہ ملک آتا نیام اٹ واپار آن نہ صرف پاکستان بلکن ایران ئِ ہم فائدہ مریک۔ اسپیکر بلوچستان اسمبلی پارے کہ ایران و پاکستان نا الس نا نیام اٹ سوگو دودوربیدہ و راجی تعلقداریک اڈ ہلوک ئُ ہراٹی مستی گچین وخت انا گرج ئِ وخت اس کہ پاکستان ایران جوائنٹ چیمبر آف کامرس اینڈ انڈسٹری نا جوڑ کننگ بھازاہمیت تخک ہراڑآن ہڑتوم آ برادر ہمسایہ ملک آتا نیام اٹ واپار نا بشخ اٹی غیر معمولی ودکی اس مریک۔
