اسلام آباد۔ 27 دسمبر (اے پی پی) نیشنل ڈیزاسٹر مینجمنٹ اتھارٹی 28 آن 29 دسمبر ملک انا بڑزکو و نیامی علاقہ غاتیٹی پِر و برف انا رداٹ یخ انا موسم نا شدت اٹی ودکی نا گمان ظاہر کرینے۔ دا بابت محکمہ موسمیات نا پیشگوئی نا رداٹ بلوچستان نا قطب دیکی علاقہ غاتیٹی دیکی یخ تہو آتا نظام پترینگانے ہرانا سوب آن 28 آن 29 دسمبر ملک انا بڑزکو و نیامی علاقہ غاتیٹی یخ انا موسم نا شدت اٹی ودکی مننگ کیک۔ سے شنبےنادے آ این ڈی ایم اے نا کنڈآن جاری سرجم حوال آتا رداٹ دا موسمی نظام نااثراٹی 27 آن 29 دسمبر اٹی ، بلوچستان نا گیشتر علاقہ خاص وڑاٹ کوئٹہ، ژوب، بارکھان، زیارت، نوکنڈی، دالبندین، ہرنائی، قلعہ سیف اللہ، قلعہ عبداللہ ، چمن، پشین ، گوادر ، جیوانی، تربت ، پنجگور ، قلات، خضدار ، سبی، نصیر آباد و لسبیلا ٹی پِر اتون مش تیا برف انا گمان ءِ۔ داکان بیدس 28 و 29 دسمبر نا نن آ کشمیر، گلگت اٹی ہم پڑی پڑی آن پِر و مش تیا برف انا گمان ءِ۔ بلتستان، چترال، دیر، سوات، مالاکنڈ، کوہستان ، مانسہرہ ، ایبٹ آباد ، ہری پور، مردان ، پشاور ، چارسدہ، باجوڑ ، کرم ، وزیرستان ، کوہاٹ، سرگودھا، اسلام آباد، مری ، گلیات وپوٹھوہار ریجن اٹی پڑی پُڑی پِر انا گمان ءِ۔ ہندا وخت آ سکھر، لاڑکانہ ، جیکب آباد ، ڈیرہ غازی خان ، راجن پور، گوجرانوالہ، سیالکوٹ، لاہور، شیخوپورہ ، فیصل آباد ملتان، بہاولپور، رحیم یار خان و بھکر اٹی پِر انا گمان ءِ۔
