سکھر۔ 27 دسمبر (اے پی پی) مسکوہی وزیراعظم و پیپلزپارٹی نا مسکوہی چیئرپرسن شہید بے نظیر بھٹو نا 15 می یوم شہادت نا وخت آ اینو (سے شنبےنادے آ) گڑھی خدابخش اٹی مروک آ جلسہ غان مسکوہی صدر آصف علی زرداری و بلاول بھٹو زرداری تران کیرہ۔ داوخت آ پیپلزپارٹی نا سرکڑدہ، مرکزی راہشون و مچ آ ملک آن بروک آ کارندہ غاک گڑھی خدابخش اٹی شہید آتا مزار تیا حاضری ایترہ و پھل تخرہ۔ آ مزار نا دنگ اٹ جلسہ نا بناپیشیم نا سہ بجہ غا مریک ہراڑان بلاول بھٹو زرداری تون اوار پارٹی نا مرکزی سرکڑدہ غاک تران کیرہ۔ پنجاب، خیبرپختونخوا، بلوچستان ومچ آ سندھ آن کارندہ غاک لاڑکانہ غا سرمننگ ءُ، جلسہ گاہ ٹی ہرچار آ صوبہ غاتیان بروک آ کارندہ غاتا انکلوژرجوڑ کننگانے۔ پیپلزپارٹی نا منشاکارآتون اوار سندھ پولیس و اسپیشل سیکورٹی یونٹ نا کارندہ غاک جلسہ گاہ ٹی سیکورٹی نا فرض ءِ سرتننگ اٹی ءُ۔ اسٹیج آ سیکورٹی نا زمواری ءِ سندھ پولیس نا اسپیشل سیکورٹی کمانڈوک اداکیرہ وخت اس کہ بمب ڈسپوزل سکواڈ و ٹریفک پولیس نا کارندہ غاک ہم جلسہ گاہ و چارمہ کنڈ فرض سرتننگ ءُ۔ پیپلز ڈاکٹر زفورم نا کنڈآن جلسہ گاہ ٹی میڈیکل کیمپ اس ہم جوڑ کننگانے، جلسہ ٹی بشخ ہلنگ کن ذیلی تنظیم سندھ پیپلز یوتھ، پیپلز اسٹوڈنٹس فیڈریشن، شعبہ زالبول، کلچرل ونگ، اقلیتی ونگ انا کارندہ غاک ہم گڑھی خدابخش آ سرمسنو۔ ملک انا ایلو صوبہ غاتیان لاڑکانہ غا ہنوک آاہم شخصیت آتا راہشونی کن سکھر بالی پٹ آ ڈیسک اس جوڑ کننگانے۔ سکھر ناپارٹی راہشون بالی پٹ آ مہمان تے بخیر کننگ کن ساڑی ءِ۔
