اسلام آباد۔ 27 دسمبر (اے پی پی) بنجائی وزیر حوالکاری و شینکاری مریم اورنگزیب مسکوہی وزیراعظم و پاکستان پیپلزپارٹی نا چیئرپرسن گودی بینظیر بھٹو ءِ اونا شہیدی دے آ خراج عقیدت پیش کرسا پارینے کہ بے نظیر بھٹو شہید تینا پن آنبار بے نظیر ئسک، او صبر آزما حالیت آتیٹی ہم اسہ نرزور ءُ مسڑ، لمہ، اُرائی و ایڑھ اسے نا رشتہ ءِ بھاز جوانی و جیرت اٹ سرتس ، بے نظیر بھٹو سیاست اٹی تدبر، نرزوری و جہد نا روشنا درور ءِ ، او آخیریکو دم اسکان بنجانا زمزیر مرسا پاکستان نا سیوت ، شونداری و شونہالی کن برسرپیکار ئسک۔ سے شنبے نادے آ بینظیر بھٹو نا یوم شہیدی آ تینا کلہو اٹی بنجائی وزیر حوالکاری پارے کہ بینظیر بھٹو زالبول سیاسی کارندہ غاتیکن اسہ تحریک اسے نا درجہ تخاکہ ہرا مدام آمریت ءِ ہکل تس۔ اوپارے کہ گودی بینظیر بھٹو جندی زند اٹی ہم بھاز ڈکھیائی سہا ولے مشکل آک اونا سیاسی و جمہوری جہد ءِ پین واکدار و توانا جوڑ کرسا کرے۔ آئین ، پارلیمنٹ، جمہوریت ، السی حق و راجی گچینی کن بینظیر بھٹو شہید نا جہد مدام یات تخنگک، اونا شہیدی پاکستان نا بھاز بھلو نسخان ئسک ہرادے قوم اسُل است آن دننگ کپک۔ بنجائی وزیر حوالکاری پارے کہ اینو نادے مسکوہی صدر آصف علی زرداری ءِ ہم خراج تحسین پیش کینہ ہرا ’’پاکستان کھپے‘‘ نا نعرہ ءِ خلسا پاکستان نا سیوت ءِ پین سوگو کریسس۔ بنجائی وزیر حوالکاری مسکوہی صدر آصف علی زرداری ، بلاول ، بختاور و آصفہ بھٹو تون اوار غٹ خاہوت تون ہڑزخواہی نا درشانی ءِ کرے و دعا کرے کہ اللہ تعالیٰ شہید بینظیر بھٹو ءِ جنت الفردوس اٹی جاگہ ایتے و خاہوت ءِ صبر وجمیل ایتے۔
