اسلام آباد ۔ 27 دسمبر (اے پی پی) وزیراعظم محمد شہباز شریف پارینے کہ 27 دسمبر 2007 الس نا محبوب راہشون نا شہیدی نا ناقابل فراموش دے ءِ، ملک ، الس و جمہوریت کن گودی بینظیر بھٹو نا تاریخی خذمت آتیا اودے خراج عقیدت پیش کینہ، گودی بینظیر بھٹو جمہوری و سیاسی جہد نا روشنا نشانی ءِ۔ سے شنبےنادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم محمد شہباز شریف شہید گودی بینظیر بھٹو نا کزیہ دے آ اودے خراج عقیدت پیش کرینے۔ وزیراعظم پارے کہ گودی بینظیر بھٹو جمہوری و سیاسی جہد نا روشنا نشانی ءِ، ہرا الس نا حق انا جہد اٹی شہیدی نا جام ءِ نوش کرے، 27 دسمبر 2007 نا دے الس نا اسہ محبوب ءُ راہشون اسے نا شہیدی نا ناقابل فراموش ءُ دے اسے۔ وزیراعظم پارے کہ اسلامی دنیا نا اولیکو زالبول وزیراعظم بے نظیر بھٹو نا غٹ وئی جہد پدریسہ نا ولولہ انگیز داستان ءِ، ملک، الس و جمہوریت کن گودی بینظیر بھٹو نا تاریخی خذمت آتیا خراج عقیدت پیش کینہ، آئین نا سربلندی ، آمریت نا برخلاف اوناپرعزم و نڈر السی و سیاسی تحریک تاریخ نا گمر نا قابل و روشنا ءُ بشخ اسے۔ وزیراعظم شہباز شریف پارے کہ قائد محمد نواز شریف و گودی بینظیر بھٹو ملک و الس ءِ میثاق جمہوریت نا تاریخی ٹیکی اس تس، ملک انا سیاست اٹی اسہ پوسکن ءُ دور اسے نا بناءِ کرے، میثاق جمہوریت ننا سرکڑدہ غاتا سیاسی بصیرت نا اسہ تاریخی ءُ کارنامہ اسے ہراڑان پاکستان اٹی اسہ پوسکن ءُ سیاسی کلچر و روایت اس بناکرے، گودی بینظیر بھٹو شہید دہشت گردی نا برخلاف جیرت مندانہ و پیدوار موقف اختیار کرے۔ وزیراعظم پارے کہ گودی بینظیر بھٹو نا شہیدی دہشت گردی نا برخلاف پاکستان نا آہنی عزم انا شاہدی ءِ، گودی بینظیر بھٹو ملکی دفاع نا سوگوی، آئینی ادارہ غاتا سوگوی و راجی آسراتی کن بھلو خذمت اس سرتس۔ وزیراعظم پارے کہ مسکوہی صدر زرداری، بلاول بھٹو زرداری تون اوار خاہوت و شہید بینظیر بھٹو نا غٹ تعلقدار آتون ہڑزخواہی و ہمدردی نا درشانی ءِ کینہ، اللہ تعالیٰ شہید بینظیر بھٹو تون اوار غٹ شہید آتا درجہ غاتے بڑزکے و خاہوت ءِ صبر و جمیل عطاکے۔
