ڈیرہ اسماعیل خان۔26دسمبر(اے پی پی) وزیراعظم شہباز شریف پارینے کہ دہشت گردی ملک اکن فتنہ ءُ ناسور اسے، اودے لتاڑنگک، گھڑی دُز ملک ءِ دنیا ٹی بدنام کرے، زرگزران نا بیڑہ ءِ غرق کرے و سنگت ملک آتون تعلقداری تے خراب کرے، خیبر پختونخواہ ٹی نوکاپ آن بھسکاری مسکوہی حکومت نا غلط ڈٹ بندی نا سوب آن مس، عمران نیازی نا غلط پالیسی تا سوب آن ملک خواتہ مننگ نا خڑک ئسک، مخلوط حکومت خواتہ مننگ آن اودے بچفے، الس فریشان مف ملک ءِ مشکل آتیان کشنہ، نوکاپ زہمی تا اُراتیٹی آبادکاری اسکان آسرات تولپنہ، ارب آ روپئی نا شونداری ڈٹ آتیان سویلی خیبر پختونخواہ و ڈیرہ اسماعیل خان اٹی شونداری و شونہالی بریک۔ او دا خیال آتا درشانی ءِ دوشنبے نا دے آ داڑے چندی شونداری ڈٹ آتا بنداو و بناءِ کننگ نا وخت آ دود آن تران کرسا کرے۔ دود اٹی جمعیت علمائے اسلام (ف) نا امیر و ہی ڈی ایم نا سروک مولانا فضل الرحمان، گورنر خیبر پختونخواہ حاجی غلام علی، بنجائی وزیر ڈٹ بندی و شونداری احسن اقبال، بنجائی وزیر ہائوسنگ و تعمیرات مولانا عبدالواسع، بنجائی وزیر مذہبی امور مفتی عبدالشکور، بنجائی وزیر مواصلات اسعد محمود، بنجائی وزیر حوالکاری و شینکاری مریم اورنگزیب، وزیراعظم نا سلاہکار انجینئر امیر مقام، ڈپٹی اسپیکر قومی اسمبلی زاہد اکرم درانی تون اوار بڑزکو سرکاری آفیسر آک و علاقہ نا سرکڑدہ غاک بشخ ہلکر۔ وزیراعظم پارے کہ دہشت گردی نا فتنہ دوارہ کاٹم ہرفنگ ءِ، بنوں ٹی بھاز است ہسون ءُ واقعہ اس پیش بس، ولے کانود نافذ کروک آ ادارہ غاتا کارندہ و کمانڈو آفیسر و ورناک آپریشن کریر، آپریشن اٹی بشخ ہلوک آ آفیسر و ورناتے خراج تحسین پیش کینہ، دا واقعہ ٹی شہید مروک آ آفیسر و کارندہ غاک ننا ہیروک ءُ۔ اوفتا قربانی تے مدام یات تخنگک، او جیرت و نرزوری نا تاریخ اس نوشتہ کرینو، واقعہ ٹی ٹھپی مروک آ آفیسر و ورناتا ہسپتال اٹی طب انا اریفینے، او جیرت، برزوری و پبی عزم انا درشانی ءِ کرینو، اسہ فوجی آفیسر اس چھٹی آ مننگ آن پد ہم منشاکارانہ وڑاٹ آپریشن اٹی بشخ ہلک، اونا جیرت، نرزوری و عزم ستاکڑزک۔ بلوچستان اٹی ہم اسہ پین واقعہ اس پیش بسنے، دا باندات آ دیوان اس بٹنگ انگانے، داواقعہ غاتا توننگ و دہشت گردی نا ناسور ءِ لتاڑنگ کن ہر حد اسکان ہِننگک، بنجائی و صوبائی حکومت آک و ادارہ غاک اواری اٹ بھتہ خوری، برمتہ و دہشت گردی نا فتنہ ءِ چٹفرہ۔ وزیر اعظم پارے کہ دا علاقہ ٹی منہ تُو مست ہراتم او بسوسس ہر کنڈا دیر ہی دیر ئسک، نوکاپ آن بھاز بھسکاری مس، ولے اینو داڑے شونداری و شونہالی نا ڈٹ آتا بنداو ءِ تخنگانے، نوکاپ آن نوشہرہ، چارسدہ کالام، کوہستان، ڈیرہ اسماعیل خان، و ٹانک اٹی بھاز نسخان مس، سوات اٹی ہرا بھسکاری مس، اوٹی بھلو بشخ اس مسکوہی حکومت نا غلط ڈٹ بندی ناءِ۔ دریانا تہہ ٹی ہوٹل و جاگہ جوڑکننگا، و صوبہ ٹی ہمو پارٹی نا حکومت ءِ ہرا ایلوفتیا تنقیدکیک ولے تینا خراب گورننس و حکومت نا ہیبدار کارکڑد نا سوب آن داڑے بھسکاری مس۔ وزیر اعظم پارے کہ بنجائی و صوبائی ادارہ غاک دے ونن نوکاپ زہمی تا کمک کن گام گیج کریر و 85 ارب روپئی نا زر نوکاپ زہمی تیٹی 25,25 ہزار روپئی فی خاہوت نا حساب اٹ بشخنگا، داکان بیدس زہمی تے کمبل، تمبو،و دوائی ہم تننگا۔ ایلو ملک آک ہم کمک کریر ولی نوکاپ زہمی تیکن وسیلہ اخس کہ خڑچ کین او کم ءُ۔ 9 جنوری آ جینوا ٹی ڈونرکانفرنس مننگ ءِ ہموڑے ہم دنیا ءِ پانہ کہ گیس آتا پیش تمنگ اٹ پاکستان نا بشخ اسہ درسد آن ہم کم ءِوخت اس کہ شون ہلوک ملک آتا زیات بشخ ءِ، ہرا بھسکاری مسنے او ننا سوب آن متنے، مخلوط حکومت و صوبہ نوکاپ زہمی تا اُراتیٹی دُوارہ آبادکاری اسکان آرام اٹ تولپنہ۔ اوپارے کہ داڑے شونداری ڈٹ آتا بنا مولانا فضل الرحمان نا ذاتی است خواہی نا درشانی ءِ، اسلام آباد آن ڈیرہ اسماعیل خان اسکان ہکلہ موٹروے ہم جوڑ مسنے۔دا موٹروے تا جوڑ کروک مسکوہی وزیر اعظم نواز شریف ءِ ہرا مچ آ ملک اٹی موٹروے تا جال اس تالان کرے و موٹروے تا سی پیک روٹ انا آخریکو بشخ انا وڑاٹ سکھر حیدرآباد موٹروے ناہم بنداو ءِ تخنگانے۔
