کوئٹہ۔ 23مئی (اے پی پی) بنجائی وزیر واپار انجینئر خرم دستگیر خان پارینے کہ گوادر میگاپروجیکٹ نا پوروی آن نہ صرف بلوچستان بلکن پاکستان نا معیشت آ بھلو زئم اس تمک ، روزگار نا وارخواہی ملک، پاکستان چائنا اقتصادی راہداری ڈٹ اٹی غٹ آن زیات زر بجلی نا پیداوار نا ڈٹ آتے کن تخنگانے۔ حکومت بلوچستان ڈغار ایتے تو بنجائی حکومت تفتان اٹی ویئر ہاﺅس و کوئٹہ ٹی ایکسپوسینٹر جوڑ جاڑ کرفک۔ داخیال آتا درشانی ئِ او دوشنبے آ کوئٹہ ٹی پاک ایران جوائنٹ چیمبر آف کامرس اینڈ انڈسٹری نا افتتاحی دود آن تران کرسا کرے ۔ داوخت آ مسکوہی بنجائی وزیر اعجاز الحق، اسپیکر بلوچستان اسمبلی راحیلہ حمید خان درانی، صوبائی وزیر جعفر خان مندوخیل ، باسک صوبائی اسمبلی نصراللہ خان زیرے ، ایران نا کونصل جنرل مجید صادقی و کوئٹہ ٹی اوغانستان نا قونصل جنرل وحیداللہ مہمند ہم ساڑی ئسر۔ بنجائی وزیر واپار خرم دستگیر پارے کہ وزیراعظم پاکستان محمد نواز شریف نا مسہ سال انا دور اٹی سنجیدگی آن ہمسایہ ملک آتون واپار کن سمت انا تعین کرے اوغانستان و ایران ننا ہمسایہ برادر اسلامی ملک ئُ اوفتے تون واپار تون اوار ایلو معاملہ غاتیا ہروڑنا کمک خواہک۔ اوپارے کہ گوادر میگاپروجیکٹ ڈٹ انا پوروی آن نہ صرف بلوچستان اٹی شونہالی بریک بلکن پاکستان شون نا کسر آ روان مریک۔ اوپارے کہ پاکستان و ایران دوست ملک ئُ واپار تون اوار زند انا غٹ بشخ آتیٹی اسہ ایلو تون کمک کننگ خوارہ۔ پاک چائنا اقتصادی ڈٹ اٹی غٹ آن زیات زر بجلی نا ڈٹ آتے کن تخانے ہنداوڑ روڈ آتا جوڑ جاڑ تون اوار ایلو ڈٹ آتا پوروی آن نہ صرف بلوچستان اٹی شون نا بناءمریک 35ارب ڈالر بجلی ودی کننگ نا ڈٹ آتیا خڑچ مریک، بنجائی وزیر پارے کہ اگہ حکومت بلوچستان کوئٹہ و تفتان اٹی ڈغار ایتے تو بنجائی حکومت تفتان اٹی ویئر ہاﺅس و کوئٹہ ٹی ایکسپوسینٹر جوڑ کننگ کن تیار ئِ۔ دود انا آخر اٹی بنجائی وزیر واپار خرم دستگیر پاک ایران جوائنٹ چیمبر آف کامرس اینڈ انڈسٹری نا عہدیدار آتے مبارکبادی ترسا ہرڈول نا کمکاری نا یخین دہانی کرفے۔ کوئٹہ ٹی ایران ناکونصل جنرل مجید صادقی تینا تران اٹ پارے کہ نن پاک ایران جوائنٹ چیمبر آف کامرس نا پوسکن گچین مروک آ عہدیدار آتے مبارکبادی ایتنہ و اومیت کینہ کہ دا ہڑتوم آ ملک آتا نیام اٹ واپار نا مون آ دننگ اٹی اہم کڑدادا کیک۔ دود آن مسکوہی بنجائی وزیر اعجاز الحق ، اسپیکر بلوچستان اسمبلی راحیلہ حمید خان درانی ، صوبائی وزیر جعفر خان مندوخیل، پاک ایران جوائنٹ چیمبر آف کامرس اینڈ انڈسٹریز نا صدر ولی محمد نورزئی ، چیمبر آف کامرس کوئٹہ نا صدر جمال ترہ کئی و ایلوک ہم تران کریر۔
