اسلام آباد۔ 23مئی (اے پی پی) بنجائی وزیر ڈٹ بندی و شون احسن اقبال پارینے کہ پاک چین سنگتی زوت استارتیان ہم مون آ کاہک ، پاکستان و چین 2018 ءٹی تینا سٹیلائٹ ئِ لانچ کیرہ، اینخو نا سال فاٹا نا اولیکو یونیورسٹی نا اڈتننگ ئِ عمل اٹی اتنگک ، پاک چین سنگتی نا 65سال ہڑتوم آ ملک آتے کن سنگ میل نا حیثیت تخک۔ چین پاکستان اٹی درملکی سرمایہ کروک آ نمبر ون ملک جوڑ مسنے، چین پاکستان اقتصادی راہداری ہڑتوم آ ملک آتا سروک آتا وژن نا ملاپ ئِ۔ سیاسی سوگوی و پالیسی تیٹی تسلسل آن ہی سرسہبی ممکن ئِ، اقتصادی راہداری ڈٹ گیم چینجر اسے ۔ داخیال آتا درشانی ئِ او دوشنبے آ پلاننگ کمیشن اٹی پاکستان چین نا نیام اٹ سفارتی سنگتی نا 65می سالگرہ نا دود آن تران کرسا کرے۔ داوخت آ خصوصی کمکار خارجہ امور طارق فاطمی و چینی سفیر، سیکرٹریز ، سفارتکار ، سول سوسائٹی، اکیڈمیا و میڈیا نا بھلو کچ اسیٹی بندغ آک ساڑی ئسر۔ بنجائی وزیر پارے کہ 65سا ل انا نیام اٹ ہڑتوم آ ملک آتا بین الاقوامی کہول آ پیش بروک آ بیشتر واقعہ و حالیت آتیا اسہ وڑموقف اختیار کریر ، اینو ہڑتوم آ ملک آتا نیام اٹ تعلقداری جیو اسٹریٹجک آن جیو اکنامک دور اٹی پترینگانے۔ اوپارے کہ وزارت ڈٹ بندی و شون اٹی داوڑنا دود آتا مننگ ثابت کیک کہ ہڑتوم آ ملک آتا نیام اٹ سنگتی پوسکن ئُ دور اسیٹی پترینگانے۔ اوپارے کہ چین پاکستان اٹی ہمووخت زرکاری کرے ہراتم ایلو ملک آک زرکاری کننگ نا خلیسورہ۔ اوپارے کہ پاک چین اقتصادی راہداری ڈٹ انا بدولت چین پاکستان اٹی غٹ آن زیات زرکاری کروک آ ملک جوڑ مسنے و ہڑتوم آ ملک آتا اقتصادی تعلقداریک بھاز ترندی اٹ شون ہلنگ ئُ۔ پاک چین اقتصادی راہداری آن دا ڈیہہ نا جیو اکنامکس حالیت بدل مریک و سٹیٹس کو ٹی ہم بدلی واقع مریک ہرانا سوب آن پاکستان ئِ سویلی ایشیا ءو نیامی ایشیاءو چین نا بابت آن اسہ کلیدی کڑداس دوئی مریک۔ اوپارے کہ چین پاکستان اقتصادی راہداری صرف روڈ و انفراسٹرکچر آخا بلکن اسہ پورو ئُ فریم ورک اسے، 46 بلین ڈالر آن 35بلین ڈالر توانائی سیکٹر اٹی کاریم اٹ بریرہ ۔ اوپارے کہ چین پاکستان اقتصادی راہداری نا بھرم آک پاکستان نا ہر علاقہ ئِ رسینگرہ۔ اوپارے کہ سی پیک ڈٹ ملک دژمن آتا خن تیٹی انداخاطران لگک انتئے کہ دا ڈٹ انا پوروی آن پاکستان نہ صرف اقتصادی بلکن دفاعی لحاظ آن بھاز سوگو مریک ، مچ آ قوم ئِ تین پہ تینی اتحاد و یکجہتی تون اواری اٹ دا ڈٹ ئِ ایسری اسکان سرکروئی ئِ و دنیا ئِ دا کلہو ئِ تروئی ئِ کہ پاکستان اٹی داسا سیاسی رسہ کشی و میوزیکل چیئرز نا گوازی مسکوہی جوڑ مسنے، داسا داڑے سیاسی سوگوی ئِ۔ اوپارے کہ سی پیک ڈٹ انا سوب دا سنگتی ہمالیہ آن بڑز اف بلکن استار تسکان بڑز مسنے ، انشاءاللہ تعالیٰ دا سنگتی نا اقتصادی نتیجہ غاک پاکستان ئِ بجلی نا تنکی نا مون ئِ توننگ و ملک انا تہہ ٹی روزگار نا وارخواہی ودی کننگ آن بیدس ہر چار آ صوبہ و پسماندہ علاقہ غاتے راہداری نا ذریعہ منسلک کننگ نا موقع ملک و چین و نیامی ایشیاءئِ اسہ ایلو تون گنڈنگ آن ڈیہہ ٹی اسہ پوسکن ئُ دور اسینا بناءمریک۔
