اسلام آباد۔ 23مئی (اے پی پی) پاکستان اٹی چین نا سفیر سن وی ڈانگ پارینے کہ پاکستان و چین معاشی سفارت کاری نا رشتہ ٹی تفوک ئُ۔ ہڑتوم آ ملک آتے اواری اٹ تینا الس نا گچینی کن کاریم کروئی ئِ، پاکستان و چین نا سنگتی ”آئرن برادر“ نا مثال انا وڑاٹ پنی مسنے و ہڑتوم آملک آتا الس بے پرخ دا سنگتی نا مخ تفی ئِ کننگ ئُ۔ داخیال آتا درشانی ئِ او دوشنبے آ داڑے پاک چین سفارتی تعلقداری نا 65می سالگرہ نا وخت آ اڈ ہلوک آ دود آن تران کرسا کرے۔ چینی سفیر پارے کہ ہڑتوم آ ملک آک ہمیشہ اسہ ایلو نا مفادات آتا رکھ ئِ کرینو۔ پاک چین اقتصادی راہداری ہڑتوم آ ملک آتا سنگتی ئِ بڑزاسکان سرکرے، دا ڈٹ محض پائلٹ ڈٹ اسے، ننے اواری اٹ پین کیہی ڈٹ شروع کروئی ئِ۔ اوپارے کہ پاک چین اقتصادی راہداری ڈٹ داسا عملدرآمد نا مرحلہ ٹی ئِ۔ توانائی ، موٹرویز و گوادر پورٹ نا پورو ی زوت مریک۔ چینی سفیر پارے کہ پاکستان و چین نا نیام اٹ 1951ءٹی تعلقداریک اڈ ہلکونو ، ہڑتوم آ ملک آتا نیام اٹ تعلقداریک مثالی ئُ۔ پاکستان و چین اسہ ایلو تون مشکل وخت اٹی سلوک ئُ۔ اوپارے کہ چین نا صدر پاکستان نا دورہ ئِ کریسس و اونا دا دورہ غان ہڑتوم آ ملک آتا نیام اٹ تعلقداری تے پین وسعت ملانے۔ اوپارے کہ پاک چین اقتصادی راہداری آ کاریم ترندی اٹ جاری ئِ ، چین پاکستان اقتصادی راہداری صرف چین و پاکستان نا نیام اٹ کمک ئِ ودفنگ کن حکمت عملی نا پن آخا بلکن دا دا مچ آ ڈیہہ نا شون و شونہالی کن اہم کڑد ادا کیک۔ اقتصادی راہداری آن نہ صرف ہڑتوم آ ملک بلکن ڈیہہ نا ایلو ملک آتے ہم فائدہ رسینگک۔ چینی سفیر پارے کہ اقتصادی راہداری ہڑتوم آ ملک آتا نیام اٹ اہم بشخ آتے ٹی کمکاری آ مبنی گا م گیج و ڈٹ آتا جامع پیکج ئِ، ہراٹی اطلاعات نیٹ ورک ، بنداوی ڈھانچہ ، توانائی ، صنعتیں ، کشت و کشار ، سیل و سوات و چندی ایلو بشخ آک اوارو۔
