کابل۔ 23مئی (اے پی پی) اوغانستان نا قطبی صوبہ قندوزاٹی امریکی ڈرون جلہو اٹی 13طالبان تپاخت کریر، ہرات نا گورنر نا ہنکین نا خڑک دھماکہ ٹی 7 بندغ ٹھپی مسر، ہلمند اٹی طالبان تا جیل آن 23بندغ ئِ بازیاب کرفنگا و دا وخت آ جھیڑہ ٹی 8طالبان تپاخت کریر، فرح ٹی اسہ دھماکہ اسینا نتیجہ ٹی بارڈر گارڈز انا کمانڈر و اونا محافظ تپاخت کریر۔ اوغان میڈیا نا رداٹ کمامدار آک پاریر کہ تدوک آ دے قطبی صوبہ قندوز اٹی امریکی ڈرون جلہو اٹی 13طالبان تپاخت کریر۔ کمامدار آک جلہو نا ہند و کہوک آ بندغ آتا بارواٹی سرجم حوال آتے تتنو ۔ یات سلے کہ اسہ دے مست امریکہ جاسوس جہاز انا جلہو اٹی طالبان نا اہم راہشون ملامنصور ئِ تپاخت کننگ نا داوا کریسس ۔ صوبہ ہرات نا گورنر نا ہنکین نا خڑک اسہ دھماکہ اسیٹی 7بندغ ٹھپی مسر۔ کمامدار آک پاریر کہ ٹھپی مروک آ بندغ آتیٹی 2چناہم اوار اریر۔ دھماکہ نا سوب آتا بارواٹی ہچ پاننگ تو۔ اوغان کمامدارآک صوبہ ہلمند اٹی طالبان تا جیل آن 23بندغ ئِ بازیاب کرفینو، دا وخت آ جھیڑہ ٹی 8طالبان تپاخت کریر۔ کمامدار آک پاریر کہ سیکورٹی ادارہ غاک طالبان تا جیل انا برخلاف کارروائی کریر داوخت آ مروک آ جھیڑہ ٹی 8طالبان تپاخت کریر دا جیل مرجا ضلع ٹی اڈتننگاسس و اوٹی سیکورٹی کارندہ غاتون اوار کیہی شاری تے بندی کننگاسس۔ ہلمند نا گیشتر علاقہ غاتیا طالبان تا کوزہ ئِ و اوغان حکومت کن دا علاقہ ٹی تینا عملداری ئِ اڈ تننگ ہمیش آن ویل اس مسنے۔ دیکی صوبہ فرح ٹی اسہ دھماکہ سینا نتیجہ ٹی بارڈرگارڈز انا کمانڈر و اونا محافظ تپاخت کریر دا واقعہ ضلع جوئین نا علاقہ ٹی پیش بس۔ کمامدار آتا رداٹ کمانڈرنا گاڈی بارودی سرنگ نا مون اٹی بننگ آن زوردار دھماکہ اس مس ۔ داوخت اسکان اسہ رڑاس ہم دا جلہو نا زمہ واری ئِ امنا کتہ نے۔