دوحہ۔ 23مئی (اے پی پی) یمن کن اقوام متحدہ نا ایلچی اسماعیل ولد شیخ احمد پارینے کہ یمنی کڑدہ غاتا نیام اٹ امن مذاکرات اٹی پیش رفت مننگ ئِ و ملک انا بیشتر علاقہ غاتیٹی جنگ بندی آ عملدرآمد کننگ انگ ئِ ۔ دا ہیت ئِ او قطری دارالحکومت دوحہ ٹی اسہ فورم اسیان تران کرسا پارے۔ اوپارے کہ یمن اٹی جنگ بندی آ 80آن 90درسد اسکان عملدرآمد کننگ انگ ئِ ۔ البتہ گڑاس ہند آتیا بیدادی نا چرجوئی برجائِ۔ اوپارے کہ جنگ بندی نا نتیجہ ٹی جنگ آن زہمی علاقہ غاتیٹی امدادی آ گڑاتے سرکننگ اٹی کمک ملانے۔ اونا پاننگ ئس کہ کویت اٹی جاری امن مذاکرات نا وخت بیشترمتنازعہ معاملہ غاتیا درشانِ خیال کننگانے و کڑدہ غاک جھیڑہ نا ایسری نا خڑک رسینگانو۔ اوکان بیدس سفارتی ذرائع پارے کہ یمنی حکومت نا ڈل ئِ اقوام متحدہ نا ایلچی نا کنڈآن اسہ چھٹی اس ملانے۔ اوٹی داہیت آزورشاغنگانے کہ جھیڑہ نا ایسری کانود نا حاکمیت ، خلیجی ملک آتا گام و اقوام متحدہ نا سلامتی کونسل نا قرارداد 2216آ مبنی مریک۔
