ایس پی قلعہ سیف اللہ منظور احمد بلیدی نا ’’اے پی پی‘‘ تون گپ وتران
کوئٹہ۔ 11 اکتوبر (اے پی پی) ایس پی قلعہ سیف اللہ منظور احمد بلیدی پارینے کہ آئی جی پولیس بلوچستان نا منشیات نا برخلاف خصوصی مہم نا چرجوئی ٹی منشیات بہاکروک و اسمگلر آتا برخلاف سخت کارروائی برجاءِ ، منشیات اسہ ناسور اسے اودے ماس کش کننگ اٹ ہچ وڑنا رعایت کپنہ، منشیات بہاکروک چائے اخس ہی واکدار مرے اونا برخلاف سخت کانودی کارروائی کننگک۔ داخیال آتا درشانی ءِ او سے شنبے نادے آ’’اے پی پی‘‘ تون گپ وتران کرسا کرے۔ ایس پی قلعہ سیف اللہ منظور احمد بلیدی پارے کہ امن وایمنی نا حالیت آتے برقرار تخنگ کن علاقہ ٹی چندی چھاپہ خلنگک دُز داڑیل آتتون سختی اٹ مون تننگک کانود نا گرفت آن کس اس بچنگ کپک، اوپارے کہ الس نا پولیس آ پت ءِ بحال کننگ نا پبی کوشست مریک پولیس و الس نا پت انا بحالی آن منشیات بہا کروک و دُز داڑیل آتا برخلاف کارروائی کننگ اٹ بھاز بھلو سرسہبی اس دوئی کننگ مریک۔ اوپارے کہ قلعہ سیف اللہ نا الس ءِ تھانہ سے آن غاو مرے الس بلاجھجک کنتون رابطہ کننگ کیک، اومستی پارے کہ منشیات اسمگلر آتیان مستی جاست وپاست نا بناءِ کرینن بھاز زوت منشیات اسمگلر آتا کاٹم خواجہی ءِ کروک آتا برخلاف کارروائی کننگک۔ اوپارے کہ انسپکٹر جنرل پولیس بلوچستان عبدالخالق شیخ انا خصوصی پارت آ مچ آ ضلع ٹی منشیات بہاکروک کسبی ڈوہدار زموار آتا برخلاف کریک ڈاؤن نا بناءِ کننگانے ، داوخت آ ایس ایچ او قلعہ سیف اللہ ایس پی قلعہ سیف اللہ منظور احمد بلیدی نا خصوصی پارت آ کارروائی کرسا عطاء اللہ پنی ءُ بندغ اسے ناکوزہ غان 10.5کلو گرام چرس و نیم کلو اس کرسٹل دوئی کرسا اونا برخلاف مقدمہ درج کرسا مستی جاست وپاست نا بناءِ کرینے، داوخت آ ارٹ میکو کارروائی ٹی جہانگیر پنیءُ بندغ اسے نا کوزہ غان نیم کلو اس چرس دوئی کرسا اودے دزگیر کرے و اونا برخلاف مقدمہ درج کرسا مستی جاست وپاست نا بناءِ کرینے وخت اس کہ گشتی پولیس نا ٹیم کارروائی کرسا اسہ عادتی ڈوہدار شاہ جہان ءِ دزگیر کرسا اونا کوزہ غان اسہ دانہ اس پسٹول و 160 کلو گرام چرس دوئی کننگانے ہرانا برخلاف جتا جتا مقدمہ درج کرسا جاست وپاست نا بناءِ کرینے، دا سرسہب کارروائی تیٹی ایس پی قلعہ سیف اللہ بلیدی ایس ایچ او ءِ مبارکباد پیش کریر و مستی ضلع نا ایس ایچ او و پولیس چوکی و پولیس نا گشتی موبائل آتے ہم سختی اٹ پارت کیوہ کہ منشیات بہاکروک و کسبی ڈوہدار بندغ آتا برخلاف پبی کارروائی کیر ، اوپارے کہ تھانہ نا دنگ و پولیس چوکی ناایریاٹی کسبی ڈوہدار بندغ و منشیات بہاکروک آتا برخلاف سخت کارروائی کیر کنے ڈیلی رپورٹ ایتر ، اوپارے کہ آئی جی پولیس نا مچ آ صوبہ ٹی منشیات بہاکروک آ تابرخلاف گرینڈ آپریشن نا بناءِ کرینے نن ہم تینا ضلع ءِ دا منشیات آن پاک کرسا دم کشنہ ، اوپارے کہ پولیس الس نا جان ومال و عزت نا ضامن ءِ ولے الس پولیس تون کمک کے انتئے کہ اینو نن اگہ دا منشیات بہاکروک آتا برخلاف توار بڑز کپنہ تو بروک آ چین ننے اسُل معاف کپک ۔ داوخت آ قلعہ سیف اللہ نا الس ایس پی قلعہ سیف اللہ منظور احمد بلیدی نا منت واری ءِ ہرفسا اومیت ظاہر کرے کہ ہندا وڑ منشیات نا برخلاف کریک ڈاؤن قلعہ سیف اللہ و مسلم باغ اٹی کیر تانکہ داناسور آن الس ءِ سکون ملنگ کے۔
