کوئٹہ۔ 05 اکتوبر (اے پی پی) ایڈمنسٹریٹر لوکل گورنمنٹ کوئٹہ عصمت اللہ بازئی پارینے کہ لوکل گورنمنٹ تینا کچ اٹنگا وسیلہ غاتیٹی رہینگساالس ءِ آسراتی تا فراوانی کن کوشست کننگ ءِ الس ہرجاگہ غا کچرہ غاتے خسنگ نا جاگہ غا اوفتے کن جتا کروک آ جاگہ غا اوفتے خسر تانکہ وخت آ اوفتے ٹھکانہ خلنگ مرے، لوکل گورنمنٹ نا کنڈآن نوکاپ آن پد پشہ غاتا چٹفنگ و ملیریا نا تالانی ءِ توننگ کن اسپرے نا کاریم برجاءِ۔ داہیت ءِ چار شنبے نادے آ او تینا دفتر اٹی اوڑدہی کروک آ علاقہ نا متبر آتا اسہ ڈل اسے تون گپ وتران کرسا پارے۔ عصمت اللہ بازئی پارے کہ عملہ و فنڈ آتا کمتی آن پد ہم محکمہ لوکل گورنمنٹ ڈسٹرکٹ کوئٹہ نا دنگ اٹ بروک آ علاقہ غاتیٹی سفائی ءِ پک کننگ انگ ءِ و کچرہ غاتے ٹھکانہ خلنگ نا چرجوئی ہم برجاءِ کچرہ غاتے ہرفنگ کن پرائیویٹ مشینری ءِ ہم کرایہ غا دوئی کننگانے۔ اوپارے کہ کوئٹہ شار ننا غٹ انا اسیجائی اُرا ءِ ہرادے ساف و ستھرا تخنگ کن شاریک لوکل گورنمنٹ نا عملہ تون کمک کیرو کچرہ غاتے جاگہ جاگہ غا خسنگ نا جاگہ غا جتا کروک جاگہ غاتیا مچ کیر تانکہ اوفتے ہرفسا وخت آ ٹھکانہ خلنگ مرے۔ اوپارے کہ بشام نا پِر تیان پد پشہ غاتا چٹفنگ و ملیریا نا توننگ کن لوکل گورنمنٹ نا کنڈآن کچلاک، شادینزئی، بلیلی، کیچی بیگ، نوحصار، ایسٹرن بائی پاس، ہنہ اوڑک و ایلو علاقہ غاتیٹی اسپرے نا خصوصی مہم برجاءِ شاریک شام انا وخت آ کن و خور نا گڑا و دیر تے ڈکھر تخر تانکہ اسپرے ٹی جانی نسخان تیان بچنگ مرے۔ عصمت اللہ بازئی پارے کہ کنا درگہ شاری تیکن بیستءُ چار گھنٹہ ملوک ءِ ، ہروڑنا غاوتیا او براہ راست کنتون رابطہ کننگ کیرہ۔
