اسلام آباد۔ 21مئی ( اے پی پی ) چین ئِ پاکستان ءَ سفیر سن وی ڈونگ ئَ گشتگ کہ چائنہ پاکستان اقتصادی راہداری منصوبہ دوھیں ملک آنی ھاترئَ پاھدگ مند اِنت، اے منصوبہ ئَ چہ پاکستان ئِ ایشین ٹائیگر جوڑ بوھگ ئِ واب راست بیت، چین ئِ صدر ذی جن پنگ ئِ گوستگیں سال پاکستان ئِ ترءُ تاب ئَ چہ پد سی پیک ئِ منصوبہ آناں گشادی ئِ گوما سرجم کنگ بوھگ ئَ اِنت ، توانائی ، انفراسٹرکچر ، گوادر دھکہ ءُ صنعتی کمک سی پیک ئِ ھاسیں بھر اَنت کہ ایشانی سرئَ عمل درآمد بوھگ ئَ اِنت ، آﺅکیں سالانی تہا اے منصوبہ ئِ تہا گیش سوبمندی رسیت۔ آ پاکستان چین سفارتی سیادیئِ 65می ودی روچ ئِ موھئَ راجی ھال رسانکی ادارگ ” اے پی پی“ پاکستان ٹیلی ویژن ءُ ریڈیو پاکستان ئَ را یک جاھ گلگودار دیئگ بوتگ۔ آئی ئَ گشتگ کہ سی پیک کہ پاکستان ، چین سیادی ئِ راج دپتر ئِ ھاسیں بُن اِشتے ، ایشی ئِ تہا روچ ئِ روژناھی ، اِشکر ءُ آپ ئَ چہ لین ودی کنگئِ پلانٹس جنگ بوھگ ئَ اَنت کہ پاکستان ئِ تہا توانائی ئِ پدمنتگی ئَ را ھلاس کنگ ئِ ھاترئَ کمک دیئنت۔ انفراسٹرکچر منصوبہ آنی ھوالگئَ یک جُستے ئِ پسو ئَ آئی ئَ گشتگ کہ قراقرم ہائی وے ئِ سرئَ تھاکوٹ تاں حویلیاں روڈ ئِ اپ گریڈیشن ، ملتان ئَ چہ سکھر موٹر وے کہ کراچی ، لاہور موٹر وے ئِ بھر اِنت ایشیئِ کارگشادی ئِ گوما بوھگئَ اِنت۔ آئی ئَ گشتگ کہ پاکستان ءُ چین ئِ درنیام ئَ جوانیں ٹیلی کمیونیکشن ئِ آسراتی پھجارینگ ئِ ھاترئَ خنجراب ئَ تاں راولپنڈی ئَ فائبر آپٹک چیر گیچگ بوھگ ئَ اِنت کہ ایشی ئِ مو ل ءُ مراد سائبر ءُ ڈیٹاراہداری جوڑ کنگ اِنت۔ گوادر دھکہ ئِ ھوالگئَ یک جُستے ئِ پسو ئَ آئیئَ گشتگ کہ گوادر دھکہ ءَ را چین ءِ ھوالگ ئَ کنگ ئَ پد بازیں سرگرمی اوستمانی ءُ میاں اوستمانی بالی پڑ ءِ تعمیر، ایکسپریس اے ئِ جوڑ کنگ ، گوادر ئَ ٹرانسپورٹ ءُ باپار ئَ گوں بندوکیں مردماناں آسراتی پھجارینگ ئِ ھوار اِنت ایشانی سرئَ گشادی ئِ گوما کار کنگ بوھگءَاِنت ۔ آئی ئَ گشتگ کہ صنعتی کواسانی ساڑی بوھگ ءَ صنعتی کمک ئِ وسیلگ ئَ دوھیں ملک آنی گروتھ ئِ تہا گیشی بیت۔ یک جُستے ئِ پسوئَ آئی ئَ گشتگ کہ اے وھدئَ دوھیں ملک آنی درنیام ئَ باپار 18.9بلین ڈالر اِنت ، 46بلین ڈالر ئَ چہ سی پیک ءِ فری ورک جوڑ بوھگ ئَ اِنت ، چین ساﺅتھ ایشا ئَ پاکستان ئِ تہ ئَ زرکاری کنوکانی تہا درساں چہ مستریں ملک اِنت ۔ آئی ئَ گشتگ کہ وت مہ وت ئَ صنعتی شریداری ءَ چہ دوھیں ملک اے کد ئَ بنت کہ وتی مصنوعات آں دگہ ملک آنی مارکیٹ آں دیم دات کن اَنت۔ چین ئِ سفیر ءَ گشتگ کہ مے کمک تنا چاگردی سیادی ئَ چہ بس نہ کنت بلکیں اے اُلسانی درنیامءَنزیکی ، دود ءُ ربیدگئِ سرپدی ، جان ءُ سلامتی ءُ وانگ ءُ زانگ ئِ پڑ ئَ تلان اِنت ۔ آئیئَ ھال داتگ کہ چین ئَ پی این سی اے اسلام آباد ئَ دود ءُ ربیدگی بنجاھ جوڑ کتگ کہ دوھیں ملک آنی دود ءُ ربیدگئِ سرگرمیاں گیش کنگ ئَ ھاسیں کرد پیلو کنگ ئَ اِنت ۔ آئی ئَ گشتگ کہ چائنہ ئَ اسلام آباد ، کراچی ءُ فیصل آباد ئَ جتاھ جتاھ وانگ ءُ زانگی بنجاھ جوڑ کتگ اَنت ءُ ھمے وڑیں ادارگ دومی شہرآں ھم جوڑ کنگ بنت کہ تنکہ مردماناں چائنہ ئِ زبانئِ سرپد بوھگئَ ارزانی بہ بیت۔ آئی ئَ گشتگ کہ کم ءُ گیش 10ہزار پاکستان نودربر اے وھدئَ چین ئِ شاہ دربرجاھءُ پیشہ وارانہ ادارگانی تہا زانت زورگ ئَ اَنت، ھرچ نوربر چین ئَ وانگ لوٹ ایت آئیئَ را سکالرشپس دیئگ بیت۔ آئیئَ گشتگ کہ دوھیں ملک دمگئِ تہا امن ءُ مھکمی لوٹ اَنت ءُ میاں اوستمانی ادارگ اقوام متحدہ، شنگھائی کمک تنظیم ءُ آسیان ئِ کار کنوکیں باسک اَنت ، چین ءُ پاکستان ئِ ھیال ءُ لیکہ خطہ ءُ دگنیا ئِ ھاسیں کارانی سرئَ یک وڑ بنت۔چین ئِ سفیر ئَ گشتگ کہ بیمکاری ءُ ناشرکاری دوھیں ملک آنی دژمن اَنت ءُ دوھیں ملک خطہئِ تہا امن ءُ مھکمی ئِ ھاترئَ کوشست کنگ ئَ اَنت۔ آئیئَ گشتگ کہ سول ءُ تران ھمک جیڑھئِ گیشءُ گیواری بنت، ھمے ھاترئَ دوھیں ملک اوگانستان ئِ تہا امنءُ ایمنی جوڑکنگئِ عمل ئَ را من اَنت ءُ امن ءُ ایمنیں گیش ءُ گیواری کہ ایشی ئِ تہا اوگانستان دیم ئَ بہ بیت دمگی ملک آنی یک ئی پاھدگ اِنت۔ یک جُستےئِ پسو ئَ آئی ئَ گشتگ کہ دوھیں ملک آنی فوج ناشرکاری کہ یک وڑیں ھترہ اِت ایشی ئِ گِرءُ دار کنگ ئِ ھاترئَ کوشست کنگ ءَ اَنت۔ آئیئَ گشتگ کہ پاکستان ئِ ناشرکاری ءِ ھلاپ ئِ جنگ ئَ را شرپ ءُ ارزشت ئِ چم ئَ چار ایت۔ آئیئَ گشتگ کہ میاں اوستمانی براتی ئَ را لوٹ ایت کہ آ ھم پاکستان ئِ ناشرکاری ئِ ھلاپ ئِ کرد ئَ را بہ ساڑااَنت ءُ پاکستان ئِ گوما سرجمیں کمک بہ کن اَنت۔ آئیئَ گشتگ کہ چین ایسٹ ترکستان اسلامک موومنٹئِ دستاں ناشرکاری ءِ آماچ بوتگ ءُ جوانیں حکمت عملی ئِ سبب ئَ آئی ئِ گوما دیم پہ دیمی کنگ بوتگ۔ آئی ئَ چین ئِ معاشی دیم روئی ئَ را پدّر کتگ ءُ گشتگ کہ گوستگیں سال چین ئَ 6.9درسد جی ڈی پی گروتھ ریٹ حاصل کتگ ئُ اے سال ھم ایر کتگیں ہدف ئِ سرئَ ڈی جی پی حاصل کتگ۔ آئی ئَ گشتگ کہ چین دگنیا ئِ تہا گشادی ئِ گوما دیم روئی کنوکیں معیشت اِتءُ میاں اوستمانی رینکنگ ئِ تہا دومی لمبر ئَ اِنت۔ آئیئَ زور پِر داتگ کہ پاکستان ھم وتی معاشی جاورئَ را گہتر کنگ ئِ ھاترئَ وتی اُلس ئَ را گہتریں آسراتی بہ پھجارین ایت۔ آئیئَ گشتگ کہ پاکستان ئِ معاشی دیمروئی جوان اِنت بلے سی پیک ءُ دومی منصوبہ آں چہ دراج بُھریں معاشی دیم روئی حاسل کنگ ئَ سوبمند بیت۔ چین ئِ سفیر ئَ زور پِر داتگ کہ پاکستان معاشی دیمروئی ئَ را برجم بہ دارایت، پاکستان ئِ گوما چین دوستناکیں سیادی ئَ را پدّر کتگ ءُ اوست ئِ درشانی کتگ کہ دوھیں ملک آنی درنیام ئَ کمک تا ں آﺅکیں 650سالاں بیت۔ آئیءَ پاکستان چین سفارتی سیادی ئِ 65می ودی روچ ئِ درگت ئَ پاکستانی راج ئَ را دل ئِ جہلانکی ئَ مراد بات داتگ۔ آئیئَ گشتگ کہ پاکستان ءُ چین ءِ سیادی ترند ءُ مھکم ءُ نمیرانیں سٹریٹجک سیادی اَنت وھدے کہ پاکستانی برات اے سیادیاں ہمالیہ ئِ کوھاں چہ بُرز ءُ زِراں چہ جُہل ءُ بینگ ئَ چہ شیرکن گُشنت، دوھیں ملک یکے دومی ئِ گران ساھت ، قدرتی اپت، ھار، زمین چنڈ ئَ یکے دومی ئِ گوما کوپگ مہ کوپگ اَنت۔ آئیئَ گشتگ کہ دوھیں ملک آنی درنیام ئَ سیادی وھدءِ گوما گیش بوھان ترند ءُ مھکم ءُ یک نسلے ئَ چہ دومی نسل ئَ سر بوھان اِنت کہ وت مہ وتی اوست ءُ بھروسہ ئِ سرئَ جوڑ اِنت، مے سنگتی جوانیں رھبندانی گوما بندوک اِنت، کہ ایشی ئَ چہ دوھیں ملک آنی اُلس ئِ درنیام ئَ ترندءُ مھکمیں سنگتی ئِ بُن اِشت ایر کتگ۔
