کوئٹہ۔ 02 ستمبر (اے پی پی) مسکوہی وزیراعلیٰ بلوچستان اسمبلی نا باسک جام کمال خان لسبیلہ ءِ 2 ضلع غاتیٹی بشخنگ آ شدید ردعمل نا درشانی ءِ کرسا پارے کہ حب ءِ ضلع اس جوڑ کننگ نا فیصلہ ہر رداٹ سہی اف، قائم مقام گورنر بلوچستان نوٹیفکیشن ءِ منسوخ کے۔ بلوچستان حکومت تدوک آ دے لسبیلہ ءِ اِرا بشخ آتیٹی بشخسا حب ءِ ضلع اس جوڑ کننگ نا نوٹیفکیشن جاری کریسس ، مسکوہی وزیراعلیٰ بلوچستان جام کمال خان تینا ویڈیو بیان اٹی پارے کہ لسبیلہ تون اوار مچ آ بلوچستان نوکاپ اٹی ڈبینگوک ءِ ، صوبہ نا الس فریشان ءِ ، دُن انگا وخت اٹی قائم مقام گورنر بلوچستان جان محمد جمالی نا کنڈآن نوٹیفکیشن جاری کننگ است ہسونی نا سوب ءِ ، اوناپاننگ ءِ کہ حب ءِ ضلع اس جوڑ کننگ نا مسخت ہموجاگہ نا الس نا شونداری وشونہالی آخا بلکن ڈپٹی کمشنر و انتظامی امور ءِ دوٹی تخنگ ءِ، اوگورنر جان محمد جمالی آن نوٹیفکیشن ءِ دمدستی وڑاٹ منسوخ کننگ نا خواست کرے۔
