آخیریکو نوکاپ زہمی بندغ نا بحالی اسکان آسرات تولپنہ، وزیراعظم شہباز شریف نا روجھان اٹی نوکاپ زہمی تیان تران

روجھان۔ 05 اگست (اے پی پی) وزیراعظم شہباز شریف پارینے کہ آخیریکو نوکاپ زہمی بندغ نا بحالی اسکان آسرات تولپنہ، صوبائی حکومت آتون اواری اٹ اسیجائی سروے کرسا اُرا و فصل آتے مروک آ نسخان نا معاوضہ کن فارمولااس جوڑ کینہ، نوکاپ آن داا علاقہ غاتے بچفنگ کن ڈٹ آتے عملی دروشم اس تننگک۔ جمعہ نادے آ نوکاپ آن زہمی راجن پور نا علاقہ روجھان اٹی زہمی تیان تران کرسا وزیراعظم نوکاپ  و پِر تیان مروک آ جانی و مالی نسخان آ است ہسونی نا درشانی ءِ کرسا پارے کہ ڈپٹی کمشنر معلومدار کرے کہ نسخان تا بنائی سروے  ءِ کننگانے۔ اوپارے کہ فصل و اُراتے ملوک آ نسخان نا جاچ اکن اسیجائی سروے اس کرفنگک، دا بابت این ڈی ایم اے ءِ پارینن کہ او پی ڈی ایم اے تون اواری اٹ فوج انا کمک اٹ سروے کے۔ اوپارے کہ پِر ونوکاپ اٹی زوال کروک آ بندغ آتا خاہوت آتیکن بنجائی وصوبائی حکومت آتا کنڈآن جتا جتا معاوضہ تننگک، اُرا و فصل آتا نسخان آ صوبہ غاتون اواری اٹ فارمولہ اس جوڑ کینہ۔ وزیراعظم پارے کہ پورو بھس مروک آ کچہ و پکا اُراتا مالک آتے 5 لکھ روپئی فی کس وخت اس کہ جزوی نسخان آ 2 لکھ روپئی تننگک۔ دا زر  ءِ زوت زہمی تا  دوٹی تننگک۔ وزیراعظم دا وخت آ زہمی تتون اوڑدہی ہم کرے ہرا اودے علاقہ ٹی مروک آ نسخان تیان معلومدار کرے وخت اس کہ او مر مر انگا علاقہ نا دورہ  ءِ کننگ و زہمی تا دادرسی آ وزیراعظم ءِ دعاتسر و اونا منت واری ءِ ہرفیر۔