یوم استحصال کشمیر نا چرجوئی ٹی صدائے روس نا کنڈآن انٹرنیشنل ویبنار اس اڈتننگا

اسلام آباد۔ 05 اگست (اے پی پی) مقبوضہ کشمیر اٹی مودی نا ہندو توا حکومت نا 5 اگست 2019 نا غیرکانودی گام آن پد کودک کشمیری تیا بھارتی ظلم اٹی شدت و جہانی برادری نا چُپی نا سرحال آ صدائے روس انا کنڈآن ماسکو آن اسہ انٹرنیشنل ویبنار اسے نا بست وبند کننگا۔ کشمیر میڈیا سروس نا رداٹ ویبنار نا ترانکار آتیٹی دفاعی جاچکار و مسکوہی سیکرٹری دفاع ریٹائرڈ لیفٹیننٹ جنرل نعیم خالد لودھی، چیئرمین کشمیر کونسل یورپ علی رضاسید، ترکی نا انسانی حق انا کارندہ ترک تورگائی ایورن و ایلوفک بشخ ہلکر۔ وخت اس کہ مہمانداری نا فرض ءِ روس اٹی رہینگوک آپاکستانی صحافی اشتیاق سرتس۔ ویبنار آن تران کرسا علی رضاسید پارے کہ ننے داسہ کشمیر نا ویل ءِ پائیدار ایسری کن مستقل مزاجی اٹ کاریم کروئی مریک و ننے 5 اگست آن پد پین چرجوئی اتون کشمیر نا ویل ءِ تالان کروئی مریک انتئے کہ پدریسہ جہد ہی ننا سرسہبی نا ضامن ءِ، اونا پاننگ ئس کہ کشمیر اٹی بھارتی ظلم آ دنیا نا چپ مننگ است ہسونی نا سوب ءِ۔ علی رضا سید پارے کہ کشمیری تا تینا حق خودارادیت نا دوئی کننگ نا جہد اسہ دے اس ضرورسرسہب مریک ۔ اوپارے کہ ننے جہد آجوئی کشمیر کن پین منظم وڑاٹ مون آہنوئی مریک و مستقل مزاجی اٹ کاریم کروئی مریک۔ اوکشمیری نظربند آتا یلہ کننگ کن ہم زور شاغا۔ ویبنار اٹی ساؤتھ افریقہ غان شریک سلمان خان تران اٹی کشمیر کاز کن دا خصوصی کوشست آتیا صدائے روس نا چیف ایڈیٹر اشتیاق ہمدانی نا منت واری ءِ ہرفے۔ اوپارے کہ دنیا ٹی ہر عمل نا اسہ ردعمل اس مریک، ہراوڑ مودی کشمیر ءِ غیرکانودی وڑاٹ 2019 اٹی اوار کننگ نا کوشست کرے داڑآن کشمیری تیٹی آجوئی دوئی کننگ نا اسہ پین جوزہ و ولولہ اس بسنے۔