مودی حکومت مقبوضہ جموں وکشمیر نا کانودی حیثیت ءِ بدل کرسا کشمیری تیا ظلم انا اسہ پوسکن ءُ دور اسے نا بناءِ کرے، فرح عظیم شاہ

کوئٹہ۔ 05 اگست (اے پی پی) ترجمان حکومت بلوچستان فرح عظیم شاہ یوم استحصال کشمیر نا وخت آ تینا کلہو اٹی دادے ءِ تاریخ نا تہار انگا دے گوندسا پارینے کہ 5 اگست 2019 آ مودی حکومت مقبوضہ جموں وکشمیر نا کانودی حیثیت ءِ بدل کرسا کشمیری تیا ظلم انا اسہ پوسکن ءُ دور اسے نا بناءِ کرے۔ آئین ہند اٹی مقبوضہ ریاست ءِ خصوصی حیثیت تسکہ و دیر اس آخبتی شاری ءِ و دیر اس ڈغار ہلنگ کیک۔ دا ہڑتوم آ آرٹیکل آتے چٹفنگ آن پد آن کشمیری تیا بدترین ظلم بناکرے۔ اوپارے کہ کشمیر اسہ بھلو زندان اسے ٹی بدل کننگانے کشمیری تیا ظلم و ستم تدوک آ اسہ صدی آن برجاءِ، ولے آرٹیکل 370 و 35 اے نا منسوخ مننگ آن پد آن حالیت خراب مسنے۔ اومستی پارے کہ اینو کشمیر نا آجوئی نا بیرک ءِ چست کننگ انگ ءِ۔ آزادی کشمیر نا ہرساہ آن ’’کشمیر مریک پاکستان‘‘ نا توار بڑز مننگ ءِ۔ ترجمان حکومت بلوچستان عظیم شاہ پارے کہ پاکستان نا ہر شاری کشمیری الس نا درد ءِ سمجھک۔ اینو کشمیر نا ویل ءِ ہر پڑ و ہر کہول آ تالان کننگ انگ ءِ۔ و بھارتی ظلم انا برخلاف توار بڑز کننگ انگ ءِ۔ اوپارے کہ آرٹیکل 370 نا منسوخی آن پد آن بھارت ہر چم ءِ آزموندہ کرے ولے کشمیری تا جوزہ یخ متو دا آجوئی نا پاش مننگ نا اولیکو ڈیک ءِ، فرح عظیم شاہ اقوام متحدہ و مسلم امہ غان خواست کرسا پارے کہ کشمیر اٹی بھارتی ظلم و کوزہ نا نوٹس ءِ ہلسا کشمیری الس نا حق خودارادیت نا موقع ایتے و کشمیر ناپورو آجوئی اسکان پاکستان تینا کشمیری ایلم تا مخ تفی ءِ برجاتخک۔