5اگست 2019 تاریخ نا تہار انگا دے  ءِ، وزیراعلیٰ بلوچستان نا یوم استحصال کشمیر آ کلہو

کوئٹہ۔ 05 اگست (اے پی پی) وزیراعلیٰ بلوچستان میر عبدالقدوس بزنجو پارینے کہ 5 اگست 2019 تاریخ نا  ہمو تہار انگا دے ءِ ہراتم بھارت نا حکمران جماعت بی جے پی بھارتی آئین آن آرٹیکل 370 و 35 اے ءِ چٹفسا جموں و کشمیر نا خصوصی حیثیت ءِ چٹفے۔ کشمیر پاکستان نا شہ رگ ءِ و پاکستانی و کشمیری الس نا رشتہ بے مٹ ءِ ولے بھارت ہر وار دا است آن دیک کہ پاکستانی و کشمیری ایلم تا است اوار سُرک۔ داخیال آتا درشانی ءِ او یوم استحصال کشمیر نا وخت آ جاری کروک بیان اٹی کرے۔ وزیراعلیٰ بلوچستان پارے کہ جموں وکشمیر آ بھارتی ریاستی دہشت گردی سلپروک آ چرجوئی برجاءِ و لکھ آ بے گناہ کشمیری تے شہید کننگا اوکان پد داسہ جموں وکشمیر نا خصوصی حیثیت ءِ چٹفسا کشمیری تا ڈغار تے پلسا انتہاپسند ہندوتے آباد کننگ انگ ءِ و مسلمان تا گیشتری ءِ اقلیت اٹ بدل کننگ نا کوشست کننگ انگ ءِ۔ اوپارے کہ اقوام عالم برادری بھارت نا جور و ظلم انا نوٹس ءِ ہلے و ہموڑے اقوام متحدہ نا قرارداد نا عین رداٹ کشمیری تے اوفتا حق استصواب رائے بایدے ایتے۔ وزیراعلیٰ پارے کہ بلوچستان نا الس کشمیری تا حق خودارادیت نا پورو مخ تفی و تائید ءِ کیک ہراڑکن او بھارتی ریاستی جور انا برخلاف ہر فورم آ توار بڑز کرسا کیرہ۔ اوپارے کہ بھارت کشمیری تا حق خودارادیت ءِ توننگ خواہک ہراٹی او پورو وڑاٹ ہبکہ ئی نا گواچی مسنے۔ اوپارے کہ بھارت بے گناہ کشمیری حریت راہشون یاسین ملک ءِ عمر قید نا سزا بنفے تانکہ کشمیری تا توار ءِ چٹفنگ مرے ولے دا بھارت نا خام خیالی ءِ کہ او ظلم و جور اٹ کشمیری تے اوفتا حق خودارادیت آن محروم کیک۔ وزیراعلیٰ بلوچستان غٹ پاکستانی تیان خواست کرے کہ او یوم استحصال کشمیر آ تینا کشمیری ایلم تتون پبی یکجہتی نا درشانی ءِ کیر و مظلوم کشمیری ایلم تا توار جوڑ مریر۔