ڈیرہ غازی خان۔ 05 اگست (اے پی پی) وزیراعظم شہباز شریف پارینے کہ نوکاپ و پِر تا زہمی تا نسخان تا پوروی کن اسیجائی سروے نا گرج ءِ تانکہ حقدار ءِ اوفتا حق ملنگ کے، نوکاپ زہمی تے تروک آ امداد او زہمی تیا بایدے خڑچ مرے، چیف سیکرٹری زہمی تا روا گرج آتے پورو کے، بنجائی حکومت زہمی تا کمک کن ہروخت ساڑی ءِ ۔ جمعہ نادے آ وزیراعظم …
بنجائی حکومت زہمی تا کمک ءِ کننگ کن ہروخت ساڑی ءِ، پِر و نوکاپ آن مرک آتیا معاوضہ نا دمدستی زرتننگ انگ ءِ، وزیراعظم شہباز شریف
گیشتریں ھال
ڈیرہ غازی خان۔ 05 اگست (اے پی پی) وزیراعظم شہباز شریف پارینے کہ نوکاپ و پِر تا زہمی تا نسخان تا پوروی کن اسیجائی سروے نا گرج ءِ تانکہ حقدار ءِ اوفتا حق ملنگ کے، نوکاپ زہمی تے تروک آ امداد او زہمی تیا بایدے خڑچ مرے، چیف سیکرٹری زہمی تا روا گرج آتے پورو کے، بنجائی حکومت زہمی تا کمک کن ہروخت ساڑی ءِ ۔ جمعہ نادے آ وزیراعظم ڈیرہ غازی خان ، راجن پور و لسبیلہ نا نوکاپ زدہ علاقہ غاتا دورہ ءِ کرے۔ وزیراعظم شہباز شریف نا ڈیرہ غازی خان آ سرمننگ آ اودے نوکاپ آن مروک آ نسخان، ریلیف و بحالی نا گام گیج آتابارواٹ حوال تننگا۔ داوخت آ وزیراعظم پارے کہ نوکاپ و پِر تیان مروک آ مرک آتیا معاوضہ نا دمدستی زر تننگ انگ ءِ، فصل و اُراتے مروک آ نسخان تا اسیجائی سروے کینہ، دا رداٹ این ڈی ایم اے و پی ڈی ایم اے ءِ پارت جاری کننگانے وخت اس کہ فوج انا کمک کن آرمی چیف تون ہیت مسنے اوہم داٹی کمک کیک۔ دااسیجائی سروے نا مسخت دادے کہ حقدار ءِ اونا حق ملے و اسہ حقدار اس ہم داڑآن محروم سلپ۔ اوپارے کہ اسیجائی سروے بھاز فائدہ ئی مریک، دانا پوروی آن پد دیوان اس بٹنگسا انفراسٹرکچر، سڑک، پول، اُرا و فصل آتے سرمروک آ نسخان تا پوروی آ فیصلہ کینہ، اوپارے کہ الس نا پیسہ غاک کس اسے نا جاگیر افس، داپیسہ غاک بایدے اوفتیا خڑچ مریر۔ اوپارے کہ نوکاپ زہمی تا بحالی کن صوبائی حکومت آتا ہرممکنہ کمک ءِ کینہ۔ وزیراعظم پارے کہ ڈکھیائی انسانیت نا خذمت نا جوزہ نا رداٹ پسند ناپسند آن ایڑترمرسا کاریم کروئی مریک۔ حوال اٹی وزیراعظم چیف سیکرٹری پنجاب ءِ پارت کرے کہ او زہمی تا روا خواست آتے ایسر کے۔ اوپارے کہ سروے ءِ سیاسی پسند وناپسند آن بچفنگ کن ہرجاگہ غا اسیجائی سروے نا پارت کرینے۔ داوخت آ بنجائی وزیر حوالکاری و شینکاری مریم اورنگزیب ، خصوصی کمکار عطاء اللہ تارڑ، قومی اسمبلی نا باسک سردار ریاض محمود خان مزاری، اسلم بھوتانی و چیئرمین این ڈی ایم اے لیفٹیننٹ جنرل اخترنواز ئسک ہم وزیراعظم تون اوار ئسر۔ پنجاب اسمبلی نا باسک اویس لغاری ہم وزیراعظم ءِ زہمی علاقہ غاتا حالیت آتیا حوال تس۔ وزیراعظم ءِ ہموڑے نوکاپ زہمی تا برجا کمک آ سرجم وڑاٹ حوال تننگا۔ وزیراعظم ءِ پاننگا کہ نوکاپ و پِر تیان 104 مرک مس۔ فصل و اُراک بھس مسر۔ وزیراعظم ڈیرہ غازی خان اٹی نوکاپ نا زہمی تتون اوڑدہی ہم کرے۔
