مقبوضہ جموں و کشمیر اٹی بھارتی فوج انا ظلم وکشمیری الس نا برخلاف بھارت نا 5 اگست نا اسہ کنڈی غیرکانودی گام گیج آتا مذمت ءِ کرینہ، عالم اقوام ویل انا دمدستی ایسر اس کشے، چیئرمین مرکزی علماکونسل پاکستان

فیصل آباد۔ 05 اگست (اے پی پی) چیئرمین مرکزی علماکونسل پاکستان صاحبزادہ زاہد محمود قاسمی پارینے کہ نن بھارتی غاصبانہ فوجی گھیڑ و مقبوضہ جموں وکشمیر اٹی بھارتی فوج انا ظلم و کشمیری الس نا برخلاف بھارت نا 5 اگست 2019 نا اسہ کنڈی غیرکانودی گام گیج آتا مذمت تون اوار اقوام عالم آ ن پرزور خواست کینہ کہ او مقبوضہ دامان کشمیر اٹی بھارتی کوزہ گیر فوج انا ظلم انانوٹس ءِ ہلے و کشمیر نا ویل انا دمدستی ایسری کن تینا گچین کڑد ءِ پک کے۔ او جمعہ نادے آ یوم استحصال کشمیر نا وخت آ جامعہ قاسمیہ فیصل آباد اٹی اڈ ہلوک یکجہتی کشمیر کانفرنس آن تران کریکہ۔ داوخت آ مرکزی سیکرٹری جنرل علامہ شاہ نواز فاروقی، صدر صوبہ پنجاب قاری محمد مشتاق لاہوری، صدر صوبہ سندھ مولانا آزاد جمیل، صدر صوبہ خیبرپختونخوا مولانا اکرام اللہ قاسمی، صدر صوبہ بلوچستان مفتی شکیل احمد، صدر آزاد کشمیر مولانا ممتاز الحق قاسمی ، صدر صوبہ گلگت بلتستان قاری محمد وزیر صدیقی ئسک ہم ساڑی ئسر۔ اوپارے کہ مقبوضہ کشمیر اٹی بھارتی غیرکانودی اسہ کنڈی گام گیج ءِ 3 سال انا وخت مسنے ہنداخاطرآن انسانی حق انا تنظیم تے مرے کہ او مظلوم کشمیری تیکن جہانی کہول آ توار بڑز کیر انتئے کہ کشمیری تے پدریسہ انسانی حق انا پامالی مون تروک ءِ ۔ اوپارے کہ مودی حکومت کشمیری تے تینا گل زمین آ اقلیت اٹ بدل کننگ نا ناپاک سازش کننگ ءِ ہراٹی بھارت اسل سرسہب مننگ کپک۔ اوپارے کہ بھارتی گام گیج اقوام متحدہ نا قرارداد آتا پاش آن پاش خلاف ورزی ءِ۔ اوپارے کہ مرکزی علما کونسل پاکستان کشمیری تا قربانی تے قدر انا نظر اٹ ہرک انتئے کہ کشمیری حق خودارادیت نا دوئی کننگ کن جہد کننگ ءُ۔ اوپارے کہ مچ آ پاکستانی قوم دا جہد اٹی اوفتے تون ہم کوپہ سلوک و مقبوضہ کشمیر نا مظلوم الس تون پورو یکجہتی نا درشانی ءِ کیک۔ دود آن علامہ شاہ نواز فاروقی، قاری محمد مشتاق لاہوری و ایلو ترانکار آک ہم تران کریر۔