بھارت تینا کوزہ گیری ٹی جموں و کشمیر ءِ دنیا نا غٹ آن بھلازندان جوڑ کرینے، آغا سراج درانی

کراچی۔ 05 اگست (اے پی پی) قائم مقام گورنر سندھ آغا سراج درانی پارینے کہ بھارت نا کوزہ گیری ٹی جموں وکشمیر نا الس آجوئی درشانی و ایلو بنداوی حق آتیان محروم ءُ، بھارت تینا کوزہ گیری ٹی جموں وکشمیر ءِ دنیا نا غٹ آن بھلا زندان جوڑ کرینے۔ یوم استحصال کشمیر نا وخت آ جاری بیان اٹی اوپارے کہ نہہ لکھ بھارتی فوج انا کنڈآن بھارتی کوزہ گیری ٹی جموںو کشمیر اٹی برجا گھیڑ ءِ بلاتاخیر چٹفنگے، بھارت نا 370 و 35 اے اٹی بدلی اقوام متحدہ نا قرارداد آتا پاش آن پاش خلاف ورزی ءِ۔ اوپارے کہ بھارتی گام ڈیہہ نا امن و سوگوی ءِ خطرہ ٹی شاغانے، اقوام متحدہ بھارت نا تینا کوزہ گیری ٹی جموں و کشمیر اٹی انسانی حق آتے بحال کرفے۔ قائم مقام گورنر سندھ پارے کہ کشمیری تا تحریک حق خودارادیت ءِ توننگ مودی حکومت نا وس انا ہیت اس اف، ہراتم اسکان کشمیری تے آجوئی رسینگپک ، اسہ پاکستانی اس ہم آسرات تولپک۔ آغا سراج درانی پارے کہ یاسین ملک و میر واعظ عمر فاروق تون اوار غٹ حریت پسند آتے دمدستی یلہ کننگے۔ اوپارے کہ پاکستان مظلوم کشمیری تا جہد حق خودارادیت نا ہرممکن اخلاقی ، سیاسی و سفارتی مخ تفی ءِ برجاتخک۔