وزارت خارجہ نا کنڈآن یوم استحصال نا وخت آ دفترخارجہ غان پارلیمنٹ ہائوس اسکان ریلی اس کشنگا

اسلام آباد۔ 05 اگست (اے پی پی) وزارت خارجہ نا کنڈآن 5 اگست 2019 نا غیرکانودی و اسہ کنڈی گام گیج نا برخلاف جمعہ نادے آ دفترخارجہ غان پارلیمنٹ ہائوس اسکان اسہ ریلی اس کشنگا۔ ریلی ٹی وزیردفاع خواجہ محمدآصف، سیکرٹری خارجہ سہیل محمود و دفترخارجہ نا عملہ، حریت کانفرنس نا سرکڑدہ و چندی زند انا بشخ آتیان تعلق تخوک آ مخلوق ہم ریلی ٹی بشخ ہلکر۔ داکان مست واک اٹی بشخ ہلوک آتا بھارت نا غیر کانودی کوزہ گیری ٹی جموں و کشمیر نا الس تون یکجہتی نا درشانی ءِ کننگ کن دفتر خارجہ ٹی مچ مسر اوکان پد دفترخارجہ یوم استحصال نا رداٹ زاہد زمان نا ملی نغمہ ءِ جاری کرے۔ ملی نغمہ کشمیری تا حق خودارادیت و بھارتی خونی پنجہ غاتیان آجوئی نا پدریسہ غا خراج عقیدت ءِ۔ کشمیر نا بارواٹ دا ملی نغمہ ءِ زاہد زمان خصوصی وڑاٹ تیار کرینے۔ ریلی ٹی بشخ ہلوک آک اوکان پد دفترخارجہ غان شاہراہ دستور آن مرسا پارلیمنٹ ہائوس آ سرمسر۔ مقبوضہ کشمیر اٹی 5 اگست 2019 نا بھارتی غیرکانودی و اسہ کنڈی گام گیج نا برخلاف تہہ و پیشن نا ملک یوم استحصال ءِ پبی وڑاٹ اڈتننگ انگ ءِ ، وزارت خارجہ مظلوم کشمیری تتون یکجہتی کن اسلام آباد و پیشن نا ملک پاکستانی سفارت خانہ غاتیٹی چندی پروگرام تا بست وبند کرینے۔