پاکستان کشمیری تا جہد آجوئی نا سیاسی، سفارتی و اخلاقی مخ تفی ءِ برجاتخک، وزیر دفاع نا ریلی آن تران

اسلام آباد۔ 05 اگست (اے پی پی) وزیر دفاع خواجہ آصف و سلاہکار امور کشمیر و گلگت بلتستان قمر زمان کائرہ ئسک پارینو کہ پاکستان کشمیری تا جہد آجوئی نا سیاسی، سفارتی و اخلاقی مخ تفی ءِ برجاتخک دا پوروی پاکستان نا جنگ ءِ۔ او فک بھارت نا کنڈآن مقبوضہ کشمیر نا خصوصی حیثیت ءِ چٹفنگ نا گام انا مسہ سال پورو مننگ آ جمعہ نادے آ فارن آفس آن ڈی چوک اسکان کشوک آ ریلی آن تران کریرہ۔ وزیر دفاع پارے کہ نن تینا ورناچین ءِ کشمیر نا پاکستان تون رشتہ و اونا اہمیت آن معلومدار کننگ ءِ۔ نن بطور قوم دا عزم انا درشانی  و پوسکنی ءِ کین کہ کشمیر تون ننا عزم لازوال ءِ داٹی اسُل کمتی مفک۔ کشمیریک اسُل داٹی کمتی خنپسہ۔ اوپارے کہ پاکستان نا چارمہ کنڈ اٹی اینو مچی مننگ ءِ، ولے داگنج اس اف۔ کشمیر نا ویل 75 سال آن اسہ شورانک ءُ ٹھپ اسے و داٹھپ آ مالم تخنگ پاکستانی الس نا عزم ءِ۔ بیرہ خاص دے تیٹی برانز اسکان محدود مننگ اف، پاکستان نا الس داٹی کڑد ادا کے۔ اوپارےے کہ کشمیر کاز اکن ننا فوج جنگ کرینے، او ورکنگ بائونڈری و ایل او سی آ پہرہ تننگ ءُ۔ اوفتے خراج تحسین پیش کینہ۔ اوپارے کہ مچ آ دنیا ٹی پاکستانی تے کشمیری تتون تعلقداری تے پین گچین وڑاٹ تالان کروئی مریک۔ داوخت آ وزیراعظم نا سلاہکار امور کشمیر و گلگت بلتستان قمر زمان کائرہ پارے کہ دا ریلی ہمو گندہ انگا دے ءِ اڈتننگ کن ءِ ہرا 70 سال انا جور و استبداد  آن پُر ءِ ولے کشمیری تا جوزہ ہر چم آن پد ہم شیف تمیتو۔ ہراقومک دا جوزہ ءِ تخرہ اوفتے توننگ مفک۔ اوپارے کہ کشمیری تا حوصلہ ءِ پرغنگ اٹ بے سہبی آ 5 اگست 2019 آ کشمیر نا آئینی و کانودی حیثیت ءِ بدل کرسا اونا ڈیموگرافی ءِ بدل کننگ نا کوشست کننگا۔ پاکستان اٹ ہر حکومت ہندا عزم انا درشانی ءِ کرینے داوخت آ دا مقدمہ ءِ پین گچین وڑاٹ جہانی فورم تیا ہرفنگ و تینا ورناچین ءِ دا جھیڑہ غاتا بارواٹ آگاہی نا گرج ءِ۔