مچ آ قوم جہد آجوئی ٹی کشمیری ایلم تتون تفوک ءِ، سعید غنی

کراچی۔ 05 اگست (اے پی پی) صوبائی وزیر خواری و افرادی قوت سندھ سعید غنی 5 اگست یوم استحصال کشمیر نا بابت ڈسٹرکٹ ایڈمنسٹریشن ایسٹ انا رداٹ اڈ ہلوک آ ریلی نا کماشی ءِ کرے۔ ریلی نا بنا پیپلز چورنگی آن مس ، بشخ ہلوک آک مزار قائد وی آئی پی گیٹ اسکان مارچ کریر۔ داوخت آ صوبائی وزیر اگیان چند، سلاہکار وزیراعلیٰ سندھ رسول بخش چانڈیو، خصوصی کمکار صادق میمن، سندھ اسمبلی نا باسک ، ڈی سی ایسٹ راجہ طارق چانڈیو، ایڈمنسٹریٹر ایسٹ رحمت اللہ شیخ و ایلو آفیسر آک ہم ساڑی ئسر۔ ریلی ٹی چندی اسکول آتا چناک ہم بشخ ہلکر۔ ریلی نا بنا آن مست سہب انا 9 بجہ غا کشمیری تتون یکجہتی نا درشانی ءِ کننگ کن اسہ منٹ اسے کن چپی اختیار کننگا۔ داوخت آ تران کرسا صوبائی وزیر سعید غنی پارے کہ اینو مچ آ پاکستان اٹی یوم استحصال کشمیر اڈتننگ انگ ءِ، ہر سال نن 5 فروری آ یوم یکجہتی کشمیر نا وڑاٹ اڈ ایتنہ۔ اوپارے کہ 5 اگست 2019 آ بھارت کشمیر نا خصوصی حیثیت ءِ چٹفے و بھارتی آئین نا نفاذ ءِ مقبوضہ کشمیر آ ہم کرے۔ اوپارے کہ مقبوضہ کشمیر نا خصوصی حیثیت ءِ چٹفنگ آن پد مقبوضہ کشمیر نا مسلم گیشتری علاقہ غاتے اقلیتی علاقہ غاتیٹی بدل کننگ نا کوشست بناکرے، مچ آ دنیا اونا مذمت ءِ کرے ولے مودی حکومت مسلمان دشمن حکومت اسے، مودی نا مستین مسلمان تا کشت وخون آن پُر تموک ءِ۔ اوپارے کہ بی جے پی تینا منشور اٹی داہیت ءِ اوار کریسس کہ او حکومت اٹ بریک تو مقبوضہ کشمیر نا خصوصی حیثیت ءِ چٹفک، ہندن کہ مودی حکومت اٹ بس تو مقبوضہ کشمیر نا خصوصی حیثیت ءِ چٹفے و مست آن برجاظلم اٹی پین ودکی کرے۔