مقبوضہ جموں وکشمیر اٹی انسانی حق انا لتاڑ تا چرجوئی برجاءِ، صوبائی وزیر سائنس اینڈ ٹیکنالوجی مبین خان خلجی نایوم استحصال نا وخت آ کلہو

کوئٹہ۔ 05 اگست (اے پی پی) صوبائی وزیر سائنس اینڈ ٹیکنالوجی مبین خان خلجی پارینے کہ مقبوضہ جموں وکشمیر تدوک آ اِراسال آن غیر کانودی وڑاٹ بھارتی فوج انا گھیڑ ٹی ءِ مقبوضہ جموں وکشمیر اٹی انسانی حق انا سنگین لتاڑتا چرجوئی برجاءِ۔ مودی سرکار 5 اگست 2019 آ مقبوضہ جموں وکشمیر نا کانودی حیثیت ءِ بدل کرسا کودک کشمیری تیا ظلم و ستم کننگ ءِ۔ داخیال آتا درشانی ءِ او یوم استحصال کشمیر نا وخت آ ’’اے پی پی‘‘ تون گپ وتران کرسا کرے، صوبائی وزیر پارے کہ جھیڑہ ئی علاقہ نا جغرافیائی حیثیت ءِ بدل کننگ اقوام متحدہ نا قرارداد آتا خلاف ورزی ءِ۔ کشمیر نا آئینی حیثیت نا منسوخی نا فیصلہ غان پد ہزار آتا کچ اٹی کشمیری راہشون و کارندہ غاتا جبری بے گواہی بھارتی بربریت نا شاہدی اسے۔ اوپارے کہ مقبوضہ جموں وکشمیر اٹی بھارتی فوج انا دوتے اٹ لکھ آن زیات کشمیری تینا جون تے آن دوتے سلانو ہراکہ انسانی حق انا تنظیم تیکن ہم سوج انا نشان اسے۔ صوبائی وزیر مستی پارے کہ جہانی برادری نا اخلاقی زمواری ءِ کہ او کشمیری تا انسانی و سیاسی حق اکن توار بڑز کے ، اوپارے کہ پاکستان مدام کشمیری الس تون یکجہتی و اوفتا حق خودارادیت تون سلوک ءِ۔ اوپارے کہ بلوچستان نا الس تینا کشمیری ایلم تتون ہم کوپہ مرسا سلوک ءِ، جہانی راہشون تا چپی ہندوستان ءِ کشمیر آ غیرکانودی کوزہ و ظلم ءِ برجاتخنگ نا سوب اس فراوان کننگ ءِ۔