بھارت کشمیری مسلمان تا گیشتری ءِ اقلیت اٹ بدل کننگ کن اسرائیل والا وڑوڈول ءِ اختیار کرے، ڈاکٹر حمید رضا صدیقی نا اے پی پی تون گپ وتران

ملتان۔ 04 اگست (اے پی پی) پنی آ ماہر تعلیم و دانشور پروفیسر ڈاکٹر حمید رضاصدیقی پارے کہ کشمیر نا ویل غیر منقسم ہندوستان آن مست انا ءِ ، کشمیری الس ڈوگرہ راج آن ہی ہندو استحصال نا گواچی ئسر، اوفتا کوشست مسنے کہ پاکستان آنبار نن ہم ہندو تا غلامی آن تینے آجو کرفنگ اٹ سرسہب مرین ولے داوڑ مننگ کتو و چندی موقع غاتیا ہموجاگہ نا مخلوق جہد ءِ برجاتخا۔ داخیال آتا درشانی ءِ او یوم استحصال کشمیر نا بابت اے پی پی تون خصوصی گپ وتران اٹی کرے۔ ڈاکٹر حمید رضاصدیقی پارے کہ پاکستان نا جوڑ مننگ نا وخت آ ہندوستان اوڑآ جارحیت نا کمک اٹ کوزہ کرے و برصغیر نا تقسیم نا وخت آ ہرا جہانی اصول طے مسوسس اوفتے گوجالنگا۔ اقوام متحدہ ناقرارداد و ایلو باندات آتیان نن غٹ بلد اُن۔ کشمیر ءِ اسہ خصوصی صوبہ سے نا حیثیت تننگاسس و داڑکن ہندوستان نا آئین اٹی شق آتے تخنگاسس ولے مسہ سال مست پنچ اگست آ داٹی ترمیم کرسا او شق آتے کشنگا و اودے باقاعدہ بھارت نا بشخ گوندنگا داسہ دانا نتیجہ دامس کہ ہموڑے ہرا خصوصی آسراتی تے تننگاسس اوچٹانو۔