5 اگست جموں وکشمیر نا ساڑی تاریخ نا تہار ءُ دے اسے، نعیم خان

نئی دہلی۔ 04 اگست (اے پی پی) بھارت نا غیر کانودی کوزہ گیری ٹی جموں وکشمیر اٹی کل جماعتی حریت کانفرنس نا غیرکانودی وڑاٹ نظر بند سینئر راہشون نعیم احمد خان 5 اگست آ جموں وکشمیر نا ساڑی تاریخ نا تہار ءُ دے اس گوندسا پارینے کہ دادے بھارت نا استعماریت نا بناءِ ہرا جموں و کشمیر اٹی آبادی نا کچ ءِ بدل کننگ خواہک۔ کشمیر میڈیا سروس نا رداٹ نعیم احمد خان نئی دہلی نا بدنام زمانہ تہاڑ زندان آن  تینا اسہ کلہو اسے ٹی توسیع پسندانہ عزم ءِ مون آ تخسا پارے کہ کشمیری تیان اوفتا شناخت ءِ پُلنگ نا بھارتی گام مسلم گیشتری ریاست ءِ اقلیت اٹ بدل کننگ نا اونا بھلو سازش اسے نا بشخ ءِ۔ او5 اگست 2019 نا بھارتی گام ءِ بھاز سنگین گوندسا پارے کہ دفعہ 370 و A-35ءِ منسوخ کننگ نئے بیرہ بھارتی آئین نا خلاف ورزی ءِبلکن اقوام متحدہ نا قرارداد و ایلو جہانی معاہدہ غاتا روح انا ہم برخلاف ءِ۔ اوپارے کہ دا اسہ کنڈی گام گیج جہانی کانود و اقوام متحدہ نا سلامتی کونسل نا قرارداد آتا اسل خلاف ورزی ءِ۔ او پارے کہ سنگین سیاسی اثرآتا حامل دا خطرناک گام جموں وکشمیر اٹی آبادی نا کچ ءِ بدل کننگ و کشمیری تے اوفتا وسیلہ، ملازمت، درستی راستی، دودوربیدگ، ڈغار و غٹ آن ود حق خودارادیت آن محروم کننگ نا سجفوک ءُ ڈٹ اسے۔ نعیم احمد خان پارے کہ کشمیریک وخت اس ہم غیرکانودی بھارتی کوزہ ءِ امناکتنو و او5 اگست 2019 نا بھارتی گام گیج ءِ ہم یکسر مسترد کرینو۔ اوپارے کہ بھارت 1947 آن پد آن جموں وکشمیر آ تینا غیرکانودی کنٹرول ءِ سوگو کننگ کن چندی گام گیج کرے، ظالمانہ کانود نافذ کرے ولے حقیقت دادے کہ دا غٹ گام گیج کشمیری تے محکوم کننگ و سیاسی و جمہوری حق اکن جنگ تننگ نا اوفتا است خواہی ءِ توننگ اٹ بےسہب مسنے۔ اوپارے کہ بھارتی حکمران تے تینا الس ءِ ریفنگ نا جاگہ غا ڈغاری حقیقت ءِبایدے امنا کے و حق خودارادیت نا جہانی امنا مروک اصول نا رداٹ کشمیر نا جھیڑہ ءِ پرامن وڑاٹ بایدے ایسر کننگے۔