پِر و نوکاپ آن زہمی آخیریکو بندغ نا تینا اُرا ٹی آباد مننگ اسکان آسرات تولپنہ، وزیراعظم شہباز شریف

ڈیرہ اسماعیل خان ۔ 04 اگست (اے پی پی) وزیراعظم شہباز شریف پارینے کہ پِر و نوکاپ آن زہمی آخیریکو بندغ نا تینا اُراٹی آباد مننگ اسکان آسرات تولپنہ، 22 کروڑ الس نا کمک، خواری و کمکاری اٹ پاکستان ءِ قائد اعظم نا عظیم ملک جوڑ کننگ نا تغ ءِ عملی دروشم اس تننگ نا کسر اٹ ہچ ءُ اڑاند یا مشکل اس سلپک، وسیلہ غاتیان شپ ملک انا زرگزرانی وڑاٹ آئی ایم ایف نا غلام مننگ لمحہ فکریہ اسے، ننے اوڑآن خواری و سیوت اٹ نجات دوئی کروئی ءِ، نوکاپ زہمی تا بحالی کن غٹ ءِ اجتماعی بشخ ءِ شاغوئی مریک۔ داخیال آتا درشانی ءِ وزیراعظم پنچ شنبے نادے آ ڈیرہ اسماعیل خان نا تحصیل دریاخان نا یونین کونسل بندکورائی ٹی نوکاپ زہمی علاقہ نا دورہ نا وخت آ کرے۔ داوخت آ جمعیت علمائے اسلام (ف) نا سروک مولانا فضل الرحمان نوکاپ آن زہمی علاقہ غاتا دورہ ءِ کننگ آ وزیراعظم نا منت واری ءِ ہرفسا پارے کہ وزیراعظم نوکاپ و پِر تیان زہمی نیزگار آتا ڈکھ آتا مداوا ءِ کننگ کن زہمی علاقہ غاتا تینٹ دورہ ءِ کننگ ءِ۔ ڈیرہ اسماعیل خان آ بننگ آ اونا منت واری ءِ ہرفنہ۔ مولانا فضل الرحمان پارے کہ نواز شریف شونداری نا سفر ءِ ہراڑے اِلاسس زوت ہموکان اونا بناءِ کینہ۔ تدوک آ چار سال اٹی نواز شریف نا بناکروک آ غٹ ڈٹ آک بند ئسر۔ داوخت آ وزیراعظم ءِ پاننگاکہ پہاڑ پور نا 11 آن 5 یونین کونسل نوکاپ آن بھاز بے وڑ زہمی مسنو۔ داجاگہ نا مخلوق نا غٹ تر سیبو لائیو اسٹاک و کشت وکشار آ ٹے ہرا غٹ بھس مسنو۔ داوخت آ وزیراعظم زہمی تیان تران کرسا پارے کہ او نم تون ہمدردی نا درشانی ءِ کننگ کن ساڑی مسنے۔ طوفانی پِر ونوکاپ دا مچ آ علاقہ ٹی بھسکاری کرے ولے اللہ نا شکر ءِ کہ ہچ ءُ جانی نسخان اس متنے۔ ایلو علاقہ غاتیٹی مرک ہم مسنے۔ اوپارے کہ نوکاپ آن اُرا، فصل، سڑک، پول آتے نسخان مس۔ بلوچستان اٹی غٹ آن زیات نسخان مسنے۔ وزیراعظم پارے کہ بنجائی و صوبائی حکومت آتا دا فرض ءِ کہ  او مشکل نا داساہت اٹ زہمی تتون ہم کوپہ مرسا اوفتا دادرسی کن سلر۔ حکومت و انتظامیہ ءِ دا زمورای ءِ پورو کروئی مریک۔ اوپارے کہ داڑے پاننگاکہ ہندی انتظامیہ جوان کاریم کرینے وخت اس کہ صوبائی حکومت آن گلہ ءِ ولے صوبائی حکومت آک ہرجاگہ غا کوشست کننگ ءُ۔ دُن انگا آفت آتیٹی نزوریک سلرہ۔ ویل آتا ایسری کن تین پہ تینی سیوت ، سلابت و امنائی اٹ مون آ ہنسا کین تو اواری اٹ پاکستان نا الس و علاقہ غاتے مصیبت نا داساہت آن کشنگ کینہ۔ اوپارے کہ نوکاپ و پِر آن زوال کروک آتا خاہوت آتے بنجائی حکومت آن 10 لکھ روپئی تننگ نا  پڑو کننگانے ولے ہرا اُرانے اسہ کٹوک اُس مرے و او نوکاپ آن دنیا ءِ اِلے تو اونا  کاٹم آ شفقت نا دُو ءِ تخوک آ کس اس سلپک۔ اوفتے کن دا زر ہچ ءُ حیثیت اس تخپک۔ اوپارے کہ ڈکھیائی نا داساہت اٹی بنجائی و صوبائی حکومت آک نم تون سلوک ءُ۔ وزیراعظم پارے کہ بنجائی حکومت ٹھپی مروک آتا معاوضہ نا زر ءِ 25 ہزار آن ودفسا دونیم لکھ کرینے، کچہ، پکا بھس مروک آ اُراتا معاوضہ ءِ 2 لکھ آن ودفسا 5 لکھ روپئی، جزوی نسخان آ معاوضہ 25 ہزار آن ودفسا دونیم لکھ روپئی کرینے۔ اوپارے کہ بنجائی حکومت نا کنڈآن مرک آتیا 10 لکھ روپئی وخت اس ک صوبہ 8 لکھ روپئی تننگ ءِ۔ اووزیراعلیٰ خیبرپختونخوا ءِ پارے کہ اوفتا زر ءِ ودفسا 10 لکھ روپئی کے۔ 2010 نا این ایف سی ایوارڈ اٹی محصولات آتا 58 درسد صوبہ غاتے تننگ انگ ءِ۔ ہنداخاطرآن اوفتے تون وسیلہ غاتا ہچ ءُ کمتی اس اف۔ وزیراعلیٰ بلوچستان نا منت واری ءِ ہرفنہ کہ او مرک آتیا معاوضہ نا زر ءِ 10 لکھ کرے۔ ایلو صوبہ غاک ہم ہنداوڑ کیر۔ اوپارے کہ بھس مروک آ فصل آتا اسیجا سروے نا خواست کرینن۔ این ڈی ایم اے نا سروک اسہ فرض شناس فوجی آفیسر اسے۔ وزیراعظم پارے کہ او دُوارہ ڈیرہ اسماعیل خان نا دورہ ءِ کیک۔ اوپارے کہ آفت نا داساہت اٹی زہمی تتون سلوک اُن۔ آخیری زہمی بندغ آن تینا اُرا آباد مننگ اسکان آسرات تولپنہ۔