عمران خان ءِ الیکشن کمیشن فارن فنڈنگ کیس اٹ ڈوہدار پک کرینے، عابد شیر علی

اسلام آباد۔ 04 اگست (اے پی پی) مسلم لیگ (ن) نا راہشون عابد شیر علی پارینے کہ عمران خان ءِ الیکشن کمیشن فارن فنڈنگ کیس اٹ ڈوہدار پک کرینے، عدالت عظمیٰ عمران خان ءِ نابود گوندے۔ پنچ شنبے نادے آ داڑے پریس کانفرنس آن تران کرسا اوپارے کہ منہ دے مست ای سی پی تاریخ نا بھلو فیصلہ اس تسنے، عمران خان نا دفاع ءِ کروک آک پہہ مریر کہ او بنارسی ٹھگ اسے، عمران خان پاکستان نا زرگزران ءِ بھس و ملک انا سیاست نا بیڑا  ءِ غرق کرینے، نواز شریف و مریم نواز آ سٹی دوبہ خلنگا، دا چوناخلوک آ انت صادق و امین ءِ۔ عابد شیر علی پارے کہ فارن فنڈنگ داسہ پک مسنے۔ اونا بددیانتی مون آ بسنے داسہ دا ہرامون اتون پیشن ناملک آ کاہک۔ اونا پن داسہ ای سی ایل اٹی مریک، عمران خان داسہ غدار ہم پک مسنے، پاکستان نا کلچر ءِ بھس کننگ کن پیشن آن کینسر نا ناجوڑ آتا دروشم ءِ نشان ترسا پیسہ مچ کرسا کرے و سوشل میڈیا غا ٹرینڈ چلیفسا کرے، دا مچ آ باندات آتا داسہ جاست وپاست مریک۔ اسہ سوج اسے نا ورندی ٹی اوپارے کہ داسہ تو فیصلہ بسنے حکومت دافیصلہ نا خوڑتی اٹ جاچ ءِ ہلیک۔ او عمران خان ءِ مخاطب کرسا پارے کہ است آن در کہ نے کس اس بچفنگ کن بریک۔ شیخ رشید و شہباز گل تون اوار غٹ ہلنگرہ۔ نا فیصلہ غان پد عدالت عظمیٰ داسہ اودےے نابود گوندے۔ اوپارے کہ نواز شریف انصاف نا متلاشی ئس و اونا کیس ءِ خف توننگتو، داسہ داوڑ بایدے مف۔ لندن آن ملک ریاض نا پیسہ غاتے اتسا اوفتیا کابینہ غان فیصلہ کرفے دا ڈوہ آ عمران خان نا مچ آ مسکوہی کابینہ ءِ زندان اٹ شاغنگے۔