راولپنڈی۔ 04 اگست (اے پی پی) اے این ایف انٹیلی جنس اسلام آباد، پشاور و لاہور اٹی انسداد منشیات آپریشن اٹی بھلو کچ اسے ٹی منشیات دوئی کرسا زالبول اسے تون اوار 4 دوبہ دار ءِ دزگیر کرے۔ اے این ایف ہیڈکوارٹر راولپنڈی نا جاری کروک حساب وکتاب نا رداٹ پنچ شنبے نادے آ اے این ایف انٹیلی جنس اسلام آباد اٹی اولیکو کارروائی ءِ سرینگر ہائی وے آ کرے ہراٹی ٹیوٹا کرولاکار اسے آن 57 کلو 600 گرام چرس و 38 کلو 400 گرام ہفیم دوئی کرسا کار اٹی سوار عادل، حضرت علی و نازیہ پنی ءُ مسہ دوبہ دار ءِ دزگیر کرینے۔ ارٹ میکو کارروائی ءِ باچاخان انٹرنیشنل بالی پٹ پشاور آ کننگا ہراڑے بحرین کن روانہ مروک آ شہزاد خان پنی ءُ مسافر اسے نا پِڈ آن 816 گرام وزنی 102 ہیرون آن پُر کیپسول دوئی مس۔ مسٹ میکو کارروائی لاہور اٹی واقع کوریئر آفس اٹی کننگا و لیدر نا دستانہ غاتیٹی چم بازی اٹ اودیم 1 کلو 790 گرام آئس دوئی کرے۔ دا پارسل کاشف رشید پنی ءُ بندغ اسے نا کنڈآن امریکہ کن بک کرفنگاسس۔ غٹ دوبہ دار آتا برخلاف انسداد منشیات ایکٹ نا رداٹ مقدمہ درج کرسا مستی جاست وپاست نا بناءِ کننگانے۔
