اسلام آباد۔ 04اگست (اے پی پی) پاکستان بھارت نا غیر کانودی وڑاٹ کوزہ گیری ٹی جموں و کشمیر نا خصوصی حیثیت ءِ چٹفنگ نا غیر کانودی، غیر اخلاقی و غیر آئینی گام انا مذمت و بھارتی گھیڑ انا مسہ سال پورو مننگ نا وخت آ پگہ (جمعہ نادے آ) یوم استحصال اڈ ایتک۔ حکومت یوم استحصال نا وخت آ مظلوم کشمیری تتون یکجہتی نا درشانی ءِ کننگ کن سیمینار و کانفرنس آتون اوار چندی پروگرام تا بست وبند ءِ کننگانے وخت اس کہ کشمیری تا مخ تفی ٹی مچ آ ملک اٹی ریلی کشنگک ہراٹی ہر تپہ فکر انا مخلوق پبی وڑاٹ بشخ ہلیک ۔ مچ آ قوم تینا کشمیری ایلم تے دا کلہو ایتک کہ پاکستانی الس اوفتا حق خودارادیت نا انصاف اٹ جہد و بھارتی فوج انا ظلم انا برخلاف مدام اوفتے تون سلک۔ لائن آف کنٹرول نا ہڑتوم آ کنڈ و مچ آ دنیا ٹی آباد کشمیریک ہم 5 اگست 2019 نا بھارت نا غیر آئینی گام انا مذمت ءِ کننگ کن یوم استحصال اڈ ایترہ۔ ملک انا غٹ سیاسی جماعت آتا کارندہ غاک ریلی و ایلو سرجزآتا کمک اٹ مقبوضہ کشمیر نا کودک مخلوق نا برخلاف بھارتی ریاستی دہشت گردی نا برخلاف پبی برانز ریکارڈ کرفرہ۔ سول سوسائٹی نا تنظیمک کشمیری الس نا برخلاف انسانی حق انا خلاف ورزی تے تالان کننگ کن سیمینار و ایلو پروگرام تا ہم بست وبند کیرہ۔ یوم استحصال نا وخت آ مچ آ ملک اٹی اسہ منٹ اسےکن چُپی اختیار کننگک، ٹریفک ءِ اسہ منٹ اکن توننگک و سائرن خلنگک۔ اسہ منٹ انا چُپی آن دمدستی گڈ ریڈیو پاکستان و پاکستان ٹیلی ویژن تون اوار الیکٹرانک میڈیا چینل آتیا پاکستان و آزاد جموں و کشمیر نا قومی ترانہ ءِ خلنگک۔ داکان بیدس اسلام آبا د و صوبائی دارالحکومت آتا اہم سڑک آتیا کشمیری تا حالیت زار ءِ تالان کننگ و مقبوضہ کشمیر اٹی کوزہ گیر فوج انا کنڈآن کروک ا ٓٓ ظلم آتے تالان کننگ کن پوسٹر و بل بورڈ خلنگانے۔ 5 اگست 2019 آ مودی نا کماشی ٹی بھارتیہ جنتا پارٹی نا حکومت بھارتی آئین نا آرٹیکل 370 و A35ءِ چٹفیسس، داکانود نا رداٹ کشمیر ءِ خصوصی حیثیت تننگاسس۔
