فیصل آباد۔ 04 اگست (اے پی پی) فیصل آباد چیمبر آف کامرس اینڈ انڈسٹری نا صدر عاطف منیر شیخ پارینے کہ بھارت نا کنڈآن یواین او نا قرارداد و کشمیر نا خصوصی حیثیت ءِ چٹفسا کشمیری تیا بھلو ظلم اس کننگا ولے دا گام گیج آتا رداٹ نن کشمیری تا قربانی تے زیان مننگ کن الیپنہ و اوفتے حق خودارادیت نا فراوانی اسکان مچ آ بزنس کمیونٹی اوفتے تون ہم کوپہ سلک وخت اس کہ دارداٹ ہروڑنا قربانی تننگک۔ اسہ اوڑدہی اسے ٹی اوپارے کہ غٹ دنیا چاہک کہ 5 اگست 2019 آ بھارت نا کنڈآن کشمیری تیا اسہ پین ظلم اس روا تخسا نئے بیرہ اقوام متحدہ نا سلامتی کونسل نا قرارداد بلکن کشمیرنا خصوصی حیثیت ءِ ہم چٹفنگا ہراڑآ پاکستان تینا زبردست گڑتی نا درشانی ءِ کرے ولے ایلو عالم اقوام بھا ز بے حسی نا شاہدی ءِ ترسا انسانی حق انا بدترین خلاف ورزی آ چپ سلیس۔ اوپارے کہ داسہ ہم پاکستان نا حکومت تون اوار مچ آ دنیا ٹی کشمیری تتون مہرومریبت کروک آک تینا گڑتی نا درشانی ءِ کیرہ کہ یونائیٹڈ نیشن نا قرارداد آتا رداٹ کشمیر نا حیثیت ہرا مہالو ہم جھیڑہ ئی ئسک و داسہ ہم ارے اونا پرامن ایسر اس پٹنگے۔ اوپارے کہ دا گام گیج کشمیری و اوفتا بزرگ آتا قربانی تے زیان کننگ آنبار ءِ ہرا کیہی سال آن قربانی تننگ ءُ۔
