فیصل آباد۔ 04 اگست (اے پی پی) پاکستان مسلم لیگ (ن) نا مرکزی راہشون و مسکوہی وزیر مملکت چوہدری عابد شیر علی پارے کہ مظلوم کشمیری الس حق خودارادیت نا دوئی کننگ و تینا جہد آجوئی ٹی تنیا افس بلکن مچ آ پاکستانی قوم اوفتے تون ہم کوپہ سلوک ءِ، کشمیر نا ویل انا ایسری کن اوفتا سیاسی، سفارتی ، اخلاقی ، کانودی ، انسانی مخ تفی ءِ برجاتخنگک، ہراتم اسکان کشمیر نا ویل انا آخبتی و دیرپا ایسر اس کشنگپک ڈیہہ ٹی امن و پت انا فضا جوڑ مننگ کپک۔ اسہ اوڑدہی اسے ٹی او پارے کہ کمشیر نا خصوصی حیثیت نا چٹفنگ نا 3 سال پورو مننگ آ پاکستان نا چنا چنا سراپا برانز و عالم اقوام آن خواست کننگ ءُ کہ کشمیر نا ویل انا دمدستی ایسری ءِ پک کننگ کن ہر کہول آ تینا کڑد ءِ ادا کننگے۔ اوپارے کہ نن یوم استحصال کشمیر نا وخت آ مظلوم کشمیری الس تون قومی جوزہ اٹ یکجہتی نا پبی درشانی ءِ کننگ تون اوار جہانی واکدار آتا چکار ءِ بھارت نا غیر کانودی کوزہ گیری ٹی جموں و کشمیر اٹی بھارتی ظلم و استبداد و بربریت نا کنڈآ ترفنہ۔ اوپارے کہ مچ آ پاکستانی قوم بھارت نا غیر کانودی کوزہ گیری ٹی جموں وکشمیر نا مظلوم الس تون سلوک ءِ و اوفتا آجوئی اسکان آسرات تولپک۔ اوپارے کہ بھارت نا برخلاف یوم استحصال کشمیر اڈتننگ نا مسخت کشمیر نا ویل انا سنگینی ءِ جہانی کہول آ پین تالان کننگ و مظلوم کشمیری الس ءِ کلہو تننگ ءِ او جہد آجوئی ٹی تنیا افس بلکن پاکستانی قوم اوفتے تون ءِ۔ اوپارے کہ 5 اگست 2019 نا بھارت نا غیرکانودی کوزہ گیری ٹی جموں وکشمیر نا خصوصی حیثیت ءِ چٹفنگ نا بھارتی غیرکانودی و اسہ کنڈی گام گیج نا برخلاف چناک، پیرنگاک، ورناک و ہر شاری تینا کشمیری ایلم تتون یکجہتی نا درشانی ءِ کرسا عالم اقوام آ پیدوار کننگ ءِ کہ حق خودارادیت نا دوئی کننگ کن پاکستانی قوم کشمیری تتون سلوک ءِ۔
