اسلام آباد۔ 03 اگست (اے پی پی) پاکستان ‘ ون چائنا’ پالیسی ءِ پک کرسا دا پالیسی کن تینا سوگو عزم انا درشانی ءِ کرینے۔ دفترخارجہ نا کنڈآن جاری بیان اٹی پاننگانے کہ پاکستان چین انا وتواجہی و علاقائی سالمیت نا پبی مخ تفی ءِ کیک، پاکستان ءِ آبنائے تائیوان اٹی ودی مروک آ حالیت آتیا بھاز گڑتی ءِ ہرانا علاقائی امن و سوگوی آ بھلو زہم اس تمک۔ ترجمان پارے کہ دنیا مہالو آن یوکرین نا جھیڑہ نا سوب آن سلامتی نا اسہ نازرک ءُ حالیت اسے نا گواچی ءِ ہرانا جہانی خور و توانائی نا سلامتی کن منفی زہمک ءُ۔ اوپارے کہ دنیا اسہ پین داوڑ ءُ تنکی اسے سگنگ کپک ہرانا جہانی امن ، سلامتی و زرگزران آ منفی زہم تمے۔ ترجمان پارے کہ پاکستان داہیت آ پکا یخین تخک کہ ریاست آتا نیام اٹ تعلقداری تین پہ تینی شرف، تہہ نا باندات آتیٹی نیام تمپننگ و اقوام متحدہ نا چارٹر ، جہانی کانود و ہڑتوم آ کنڈآتا معاہدہ غاتا اصول آتے برقرار تخسا ویل آتا پرامن ایسری آ بایدے مبنی مرے۔
