اسلام آباد۔ 03 اگست (اے پی پی) بنجائی وزیر مواصلات و پوسٹل سروسز مولانا اسعد محمود پوسٹل سروس نا بحالی کن کاریم نا بناءِ کرینے۔ ترجمان پوسٹل سروسز نا رداٹ بنجائی وزیر مولانا اسعد محمود پوسٹل سروسز نا 4 ہزار آن زیات خورک آسامی تیا بھرتی کننگ نا پرمان جاری کرینے، بنجائی وزیر نا پارت آ 6 سد آن زیات بند ڈاکخانہ ءِ ملنگا۔ بنجائی وزیر اسعد محمود نا دا گام گیج آتیان کروڑ آ پاکستانی تے اوفتا اُرانا خڑک آسراتی دُوبریک۔ ترجمان نا رداٹ ہزار آ خاہوت آتے بلواسطہ و بلاواسطہ روزگار نا وسیلہ دوئی مریک، مسکوہی دور حکومت اٹ پوسٹل سروسز نا آسامی تے چٹفسا محکمہ ءِ پرائیوٹ کننگ نا ڈٹ ئسک، بنجائی وزیر پارے کہ پوسٹل سروس 150 سال متکن محکمہ اسے، ہرا پاکستان تون اوار مچ آ دنیا ٹی تینا خذمت آتے سرایتک۔ سیونگ بینک، پینشن، منی آرڈر تون اوار ایلو گڑاتے ڈیجیٹل کرسا بحال کینہ۔ اوپارے کہ الس ءِ اُرا تا درگہ غا آسراتی فراوان کننگک، خلقی علاقہ غاتیٹی پوسٹل سروسز نا آسراتی ءِ گچین کینہ ، اِرا کروڑ مخلوق ماہانہ ڈاکخانہ غاتیان فائدہ ہرفک۔
