اسلام آباد۔ 03 اگست (اے پی پی) بنجائی وزیر ریلوائی و ہوابازی خواجہ سعد رفیق پارینے کہ ممنوعہ فنڈنگ پک مننگ آن پد داسہ کانود و آئین نا رداٹ کارروائی کن سلابت برجاءِ، بلوچستان اٹی فلڈریلیف اٹی اختہ فوجی آفیسر آتا ہیلی کیپٹر شکست اٹی شہادت اسہ المیہ اسے۔ چارشنبے نادے آ پریس انفارمیشن ڈیپارٹمنٹ اٹی پریس کانفرنس آن تران کرسا خواجہ سعد رفیق پارے کہ بلوچستان اٹی فلڈ ریلیف اٹی اختہ فوجی آفیسر آتا شہادت اسہ المیہ اسے، پاک فوج انا ورناک مدام دفاع پاکستان وناگہانی آفت آتیٹی تینا جون تے دل دست آ تخسا مشکل اٹی تموک بندغ آتا کمک ءِ کرینو، کور کمانڈر کوئٹہ و ایلو آفیسر آتا شہیدی بھاز بھلو سانحہ اسے، شہیدآک زندہ ءُ، اللہ داشہید آتا درجہ غاتے بڑز و اوفتا خاہوت ءِ صبر و جمیل عطاکے، نن اوفتا خاہوت نا غم اٹی بریبر نا شریک اُن، پاکستان ریلوائی نوکاپ زدگان تا کمک کن ریلیف کیمپ اس خلکونے و نن شاری تیان خواست کننگ اُن کہ او انت کہ گڑا نوکاپ زدگان تسکان سرکننگ خوارہ ننے اسکان اوفتے سرکیر و او گڑاتے زہمی تسکان سرکینہ۔ ریلوائی آفیسر آک فیصلہ کرینو کہ گریڈ۔ 17 آن بڑز والاک اسہ دے انا تنخواہ ءِ نوکاپ زدگان تے ایترہ۔ این جی اوتے ہم پاوہ کہ او گڑا تے مون تننگ خوار تو نن دا چرجوئی ٹی اوفتا ہرممکن کمک ءِ کینہ۔ بنجائی وزیر پارے کہ لاہور اٹی ننا مسکوہی اومیتدار صوبائی اسمبلی نذیر چوہان نا دزگیری نا ترند انگا لوز آتیٹی مذمت ءِ کینہ۔ اومیت ءِ عدالت آک اودے انصاف فراوان کیرہ و او زوت یلہ مریک۔ اوپارے کہ لانگ مارچ اٹی بشخ ہلوک آک ملک اٹی پھسات کننگ خوائسرہ ہنداخاطرآن اوفتے دزگیر کننگاسس۔ اوفتے نذیر چوہان تون ملفنگ سہی اف۔ بنجائی وزیر پارے کہ عمران خان تینٹ خرابی کرسا اونا دوبہ ءِ مخالف آتیا خلیک و داوخت آ پک مسنے۔ عمران خان مخالف آتا برخلاف ہندن ءُ زبان اس کاریم اٹ اتیک ہرادے اسہ ہم عزت دار انسان اس کپک۔ عمران خان مدام آئین شکنی کرینے۔ اسپیکر و ڈپٹی اسپیکر آئین ءِ پرغار تو عمران خان تون سلیسر۔ عدالت آک ہم اونا برخلاف فیصلہ تسر ولے او پشووان اف۔
