اسلام آباد۔ 03 اگست (اے پی پی) بنجائی وزیر تعلیم رانا تنویر حسین پارینے کہ دنیا ٹی ڈگری تا جاگہ غا مہارت نا قدر ءِ کننگک، ننے ہم شونداری کن دنیا نا رداٹ چلینگوئی مریک۔ او چارشنبے نادے آ بنجائی تعلیمی بورڈ اٹی میٹرک نا نتیجہ غاتا دود آن تران کریکہ۔ اونتیجہ غاتیٹی پوزیشن دوئی کروک آ مار و مسن ، استاد و اوفتا لمہ و باوہ غاتے مبارکبادی تس۔ اوپارے کہ ننے خوشی ءِ کہ ننا مسنک مار تیان گچین کارکڑد نا درشانی ءِ کننگ ءُ، و زند انا ہر بشخ اٹی شون ہلنگ ءُ، نن اوفتیا گمرکینہ۔ اوپارے کہ بنجائی تعلیمی بورڈ تعلیم نا آب ءِ گچین کننگ کن اصلاحات ایسونے، ملک انا ایلو تعلیمی بورڈ آتے ہم اصلاحات اتوئی مریک و اوداڑکن غٹ صوبہ غاتا چیف منسٹر و تعلقدار کمامدار آتون ہیت کیک۔ ہرا ادارہ گچین کاری کننگ ءِ اونا بایدے تقلید ءِ کننگے۔ اوپارے کہ ننا ملک اٹی بدبختی اٹ یونیورسٹی تا کچ اتی تو بے کچ ودکی مسنے ولے آب اٹ تعلیم اٹی کمتی بسنے۔ پی ایچ ڈی تا اسہ بھلو کچ اس بے روزگار ءِ۔ ننا پی ایچ ڈی تے دنیا ٹی امنا کپننگ انگ ءِ ، داہیت ننکن لمحہ فکریہ سے۔ ننے مقدار نا جاگہ غا آب آ چکارکروئی مریک۔ اوپارے کہ دنیا دا وخت آ کسب نا تعلیم نا کنڈآ ہِننگ ءِ۔ جرمنی دا چرجوئی ٹی اسہ گچین ءُ درور اسے۔ اوپارے کہ سعودی عرب ہنر نا تعلیم نا نظام ءِ گچین کننگ اٹ ننا کمک ءِ کننگ کن تیار ءِ۔ سعودی عرب تون اوار غٹ ملک آک کسبکارافرادی قوت نا ڈیمانڈ کننگ ءُ و داڑکن ننے یونیورسٹی تیٹی کسب نا تعلیم نا بشخ اس جوڑ کروئی مریک۔ اوچیئرمین ایچ ای سی ءِ پارے کہ او دا چرجوئی ٹی کاریم کے۔ اوپارے کہ اگہ ننےشون ہلوئی ءِ تو دنیا تون چلینگوئیمریک۔ دنیا ٹی بروک آ بدلی تے تینا کروئی مریک۔
