فیصل آباد۔ 03 اگست (اے پی پی) مرکزی تنظیم تاجران پاکستان نا سرپرست اعلیٰ و انجمن تاجران سٹی فیصل آباد نا صدر خواجہ شاہد رزاق سکا پارینے کہ کودک کشمیری تیا بھارتی ظلم انا انتہامسنے ہنداخاطرآن انسانیت نا پن آ جہانی برادری نا ضمیر ءِ بیدار کننگ و جھیڑہ نا پائیدار و پرامن ایسری کن نئے بیرہ غٹ وسیلہ غاتے کاریم اٹ اتوئی مریک، سیاسی، سفارتی، اخلاقی و کانودی و انسانی بنداو تیا کشمیری تا پبی کمک ءِ برجا تخوئی مریک تانکہ او پاکستان نا شہ رگ نا آجوئی نا جہد اٹی تینے تنیا تکپس۔ اے پی پی تون گپ وتران اٹی اوپارے کہ پاکستان جہانی کہول آ دا جھیڑہ ءِ پبی وڑاٹ تالان کننگ و دنیا نا چکار ءِ دامان اٹی کشمیری تیا کروک آ ظلم انا کنڈ کرفنگ نا کوشست کننگ ءِ ولے داٹی پین شدت اتوئی مریک تانکہ دا ویل زوت آن زوت ایسر و ڈیہہ ٹی امن مننگ کے۔ اوپارے کہ ہراتم اسکان کشمیر نا ویل ایسر مفک ہمووخت اسکان نئے تو ڈیہہ ٹی آخبتی و پائیدار و دیرپابنداو تیا امن مریک و نئے ڈیہہ غان نیزگاری و بیروزگاری نا چٹنگ ممکن و نئے شونہالی بننگ کیک۔ اوکشمیر نا جھیڑہ ءِ اقوام متحدہ نا قرارداد و کشمیری الس نا است خواہی تار داٹ ایسر کننگ نا اہمیت ءِ تالان کرسا پارے کہ کودک کشمیری تیا بھارتی ظلم ناقابل برداشت حد اسکان سرمسنے۔
