کراچی۔ 03 اگست (اے پی پی) جموں کشمیر کمیونٹی اوورسیز نا وائس چیئرمین، پاکستان جرنلسٹس فورم سعودی عرب نا صدر و راجی راہشون معروف حسین پارینے کہ پاکستان کشمیری تے زرگزرانی سرجز و راجی و سیاسی زند آن محروم کننگ نا گندہ انگا کوشست آتیان پورو وڑاٹ معلومدار ءِ، یوم استحصال کشمیر نا بابت سعودی عرب اٹی ہم چندی دود آتے اڈتننگک۔ سعودی عرب نا شار جدہ غان یوم استحصال کشمیر آ ’’اے پی پی‘‘ تون چارشنبے نادے آٹیل فون آ گپ وتران کرسا اوبھارتی مقبوضہ جموں وکشمیر اٹی ننا ایڑھ و ایلم تتون تینا بدل مفروک و پکا مخ تفی و یکجہتی نا درشانی ءِ کرے۔ اوپارے کہ کشمیری تتون یکجہتی نا درشانی ءِ کننگ کن یوم استحصال کمشیر نا بابت داڑے ریاض سفارت خانہ و جدہ قونصلیٹ اٹی ہم چندی دود آتا بست وبند ءِ کننگ انگ ءِ تانکہ بھارت نا کنڈآن مقبوضہ کشمیر اٹی کروک آ ظلم و بربریت نا برخلاف گچین وڑاٹ توار بڑز کننگ مرے۔ اوپارے کہ نان کشمیری ایلم و ایڑھ تتون انسانیت نا تاریخ نا است ہسون سلوک کننگ انگ ءِ و او بھلو وخت اسے آن غیر انسانی گھیڑ اٹی بند ءُ۔ اوپارے کہ کشمیری تا وحشیانہ گھیڑ ءِ چٹفنگ و مقبوضہ جموںو کشمیر اٹی غیرکانودی ہمپنگ و آبادکاری ءِ توننگ کن جہانی برادری بھارت نا بایدے احتساب ءِ کے۔ اوپارے کہ بھارتی مقبوضہ جموں و کشمیر اٹی آبادکاری نا مسخت آبادی نا کچ ءِ بدل کرسا مسلمان تے اقلیت اٹ بدل کننگ ءِ۔
