فیصل آباد۔ 03 اگست (اے پی پی) پاکستان علما کونسل نا مرکزی ڈپٹی سیکرٹری جنرل و باسک صوبائی اتحاد بین المسلمین کمیٹی پنجاب علامہ طاہر الحسن پارینے کہ مچ آ پاکستانی قوم بھارت نا غیرکانودی کوزہ گیری ٹی جموں وکشمیر نا آجوئی و کشمیری تا حق خودارادیت نا انصاف اٹ جہد اٹی اوفتے تون سلوک ءِ و ہراتم اسکان کشمیری تے اقوام متحدہ نا قرارداد آتا رداٹ حق خودارادیت ملپک و او آجو وڑاٹ تینا زند ءِ تیر کننگ نا قابل مفسہ ہمووخت اسکان نن سوگو ءُ دیوال اسے آنبار اوفتے تون ہم کوپہ ساڑی و بھارتی ظلم و بربریت تون اوار انسانی حق انا بدترین خلاف ورزی تے ہرپلیٹ فارم آ پاش کرسا کینہ تانکہ ہیومن رائٹس نا پن انا چیمپیئن انڈیا نا اسلی مکروہ دروشم ءِ ہرسا مظلوم کشمیری تا کمک ءِ کننگ کن مون آ بننگ کے۔ اسہ اوڑدہی اسے ٹی اوپارے کہ پاکستان علما کونسل و صوبائی اتحاد بین المسلمین کمیٹی مچ آ ملک اٹی کشمیری تتون یکجہتی نا درشانی ءِ کننگ کن جمعہ نادے 5 اگست آ یوم استحصال کشمیر ءِ پبی وڑاٹ اڈ ایتک و نئے بیرہ جمعہ نا خطبہ غاتیٹی بھارتی غیرکانودی کوزہ گیری نا برخلاف توار بڑز کننگک بلکن پرامن برانزی مچی ہم کننگک ہرافتا مسخت مودی سرکار نا کنڈآن جموں وکشمیر آ کوزہ گیری کن اونا خصوصی حیثیت ءِ چٹفسا دامان اٹی آرٹیکل 370 نا غیرکانودی گام گیج آتا مذمت ءِ کننگ ءِ۔ اوپارے کہ بھارتی فوج انا کنڈآن کشمیر نا گھیڑ ءِ 3 سال پورو مننگ آ مچ آ پاکستان اٹی ہم دا دے ءِ یوم استحصال نا وڑاٹ اڈتننگک و فیصل آباد تون اوار مچ آ ملک اٹی ریلی کشنگک ہراٹی کشمیری تتون پبی یکجہتی نا درشانی ءِ کننگک۔
