کل جماعتی حریت کانفرنس نا راہشون تا کنڈآن جمعہ نادے آ تہاردے اڈتننگ نا خواست

سرینگر۔ 03 اگست (اے پی پی) غیرکانودی وڑاٹ بھارت نا کوزہ گیری ٹی جموں وکشمیر اٹی کل جماعتی حریت کانفرنس نا راہشونک کشمیری الس آن 5 اگست ءِ تہاردے انا وڑاٹ اڈتننگ نا خواست کرینو کہ تانکہ دنیا ءِ دا پیدوار کلہو تننگ مرے کہ او جموں وکشمیر اٹی بھارت نا غیر کانودی گام گیج آتے امنا کپسہ۔ کشمیر میڈیا سروس نا رداٹ کل جماعتی حریت کانفرنس نا سینئر راہشون میر واعظ عمرفاروق ہرا 4 اگست 2019 آن پدریسہ اُراٹی نظر بند ءِ سرینگر اٹی جاری اسہ بیان اسے ٹی پارے کہ کشمیری تیان 5 اگست جمعہ نادے آ تہاردے اڈتننگ نا خواست کرے۔ اوپارے کہ کشمیری الس تینا ناقابل تنسیخ  حق خودارادیت نا دوئی کننگ اسکان تینا جہد ءِ آجوئی ءِ برجاتخک۔ اوپارے کہ بھارت واک انا وحشیانہ کاریم اٹ اتنگ نا کمک اٹ کشمیری تے اوفتا ناقابل تنسیخ حق ءِ دوئی کننگ آن توننگ کپک۔ 05 اگست 2019 آ انسانیت نا دشمن نریندر مودی نا کماشی ٹی آرایس ایس نا مخ تفوک فسطائی بھارتی حکومت کشمیری تا سیاسی، راجی، مذہبی و ایلو بنداوی حق آتے سلب کرسا جموں وکشمیر ءِ اسہ بھلو زندان اسے ٹی بدل کریسس۔ میر واعظ پارے کہ 5 اگست نا مودی حکومت نا اسہ کنڈی گام گیج جموں وکشمیر نا یکتا شناخت، دودوربیدگ، آبادی و بنداوی حق آ جلہو اسے۔ اومچ آ دنیا ٹی رہینگوک کشمیری تیا زور شاغا کہ او جمعہ نادے آ بھارتی جارحیت نا برخلاف برانزی مچی کیر و دنیا نا چکار ءِ مقبوضہ جموں وکشمیر نا مظلوم الس نا حالیت زار نا کنڈآ کرفر۔