سرینگر۔ 03 اگست (اے پی پی) کل جماعتی حریت کانفرنس نا غیر کانودی وڑاٹ نظر بند چیئرمین مسرت عالم بٹ پارینے کہ 5 اگست 2019 بھارت نا غیر کانودی کوزہ گیری ٹی جموں وکشمیر نا تاریخ نا تہار ءُ دے اسے، ہراتم مودی نا فسطائی بھارتی حکومت جموں وکشمیر نا خصوصی حیثیت ءِ منسوخ کریسس۔ کشمیر میڈیا سروس نا رداٹ مسرت عالم بٹ بھارت نا زندان آن اسہ کلہو اسے ٹی ہرادے سری نگر اٹی جاری کننگا پارینے کہ مقبوضہ کشمیر نا الس تینا لمہ وطن آ بھارتی کوزہ گیری نا برخلاف پرامن جہد آجوئی ءِ برجاتخانے و اوفک 05 اگست 2019 اآ مودی نا فسطائی بھارتی حکومت غٹ غیر آئینی و غیرکانودی سامراجی گام گیج آتے یکسر مسترد کرینو۔ اوپارے کہ 3 سال آن پدریسہ برجا گھیڑ و بھارتی ریاستی دہشت گردی مچ آ مقبوضہ علاقہ ٹی ہرادے مودی حکومت ایذار سانی نا اسہ مرکز اسے ٹی بدل کرینے، خوف و دہشت نا چاگڑد اس جوڑ کرینے۔ اواست ہسونی ظاہر کرے کہ گھیڑ کشمیری تے دنیا لاوارث اِلانے و جہانی برادری نا مجرمانہ چُپی نا سوب آن بھارت ءِ مقبوضہ کشمیر اٹی انسانیت ءِ فوجی بوٹ آتا کیرغ لتاڑنگ نا ترغیب ملانے۔
