نئی دہلی۔ 03 اگست (اے پی پی) کل جماعتی حریت کانفرنس نا غیر کانودی وڑاٹ نظر بند سینئر راہشون و ڈیموکریٹک فریڈم پارٹی نا چیئرمین شبیر احمد شاہ کشمیری الس آن خواست کرینے کہ او 5 اگست ءِ تہاردے انا وڑاٹ اڈایتر تانکہ دنیا ءِ دا سوگو کلہو ءِ تننگ مرے کہ کشمیریک تینا لمہ وطن آ بھارت نا غیرکانودی کوزہ ءِ امنا کپسہ۔ کشمیر میڈیا سروس نا رداٹ مودی نا فسطائی بھارتی حکومت 5 اگست 2019 اآ مقبوضہ جموں وکشمیر نا خصوصی حیثیت ءِ منسوخ کرسا اودے اِرا یونین ٹیریٹری تیٹی بشخاسس۔ نئی دہلی نا بدنام زمانہ تہاڑ زندان اٹی غیر کانودی وڑاٹ نظر بند شبیر شاہ زندان آن جاری اسہ کلہو اسے ٹی 5 اگست 2019آ بھارتی استعمار نا بدترین درور اس گوندسا پارینے کہ بھارت دادے آ مقبوضہ جموں وکشمیر نا خصوصی حیثیت ءِ پلاسس۔ اوپارے کہ بھارتی حکومت نا اوار کننگ نا کوشست جہانی کانود و اقوام متحدہ نا قرارداد آتا پاش آن پاش خلاف ورزی ءِ ہرا اسہ کوزہ گیر ریاست اسے نا وڑاٹ بھارت ءِ ہروڑنا اسہ کنڈی کارروائی تیان سختی اٹ تورک۔ شبیر شاہ اودے غیر اخلاقی و غیرکانودی گوندسا پارینے کہ دا گام ءِ ہمووخت آ ہرفنگا ہراتم مقبوضہ جموں وکشمیر نا مچ آ علاقہ و اوناآبادی ءِ اسہ سال آن زیات وخت اسکان گھیڑ اٹ تخسا یرغمال کننگا ومواصلاتی بندش خلنگا۔ اوپارے کہ مچ آ کشمیری سرکڑدہ، سول سوسائٹی نا باسک آک، دانشور، انسانی حق انا کارندہ و وکیل آتے پورو وڑاٹ چُپ کرفنگ کن دزگیر کرسا زندان اٹی شاغنگا۔
