اسلام آباد۔ 03 اگست (اے پی پی) اسپیکر قومی اسمبلی راجہ پرویز اشرف پارینے کہ بھارت نا غیر کانودی کوزہ گیری ٹی جموںو کشمیر اٹی 5 اگست نا اسہ کنڈی گام گیج غیر آئینی و اقوام متحدہ نا قرارداد آتیان چپ ءِ، جہانی برادری کشمیری تا حق اکن سکوت ءِ پرغے و اقوام متحدہ قرارداد آتا رداٹ کشمیر نا جھیڑہ نا ایسری کن تینا کڑد ءِ ادا کے۔ 5 اگست آ اڈ تروک آ ’’یوم استحصال ‘‘ نا بابت چارشنبے نادے آ ’’اے پی پی‘‘ تون گپ وتران کرسا اوپارے کہ بھارتی حکومت نا 5 اگست 2019 ء نا کشمیر نا خصوصی حیثیت ءِ چٹفنگ نا اسہ کنڈی گام گیج غیر آئینی و اقوام متحدہ نا قرارداد آتیان چپ ءِ، کشمیر برصغیر نا بشخنگ نا بے پورو ایجنڈا ءِ۔ اقوام متحدہ و جہانی برادری ءِ ممرے کہ دا ویل انا ایسری کن تینا کڑد ءِ ادا کیر۔ اوپارے کہ کشمیر نا الس آ ظلم و ستم کننگ انگ ءِ و بھارت ہراوڑ کشمیری تا آجوئی و تواجہی ءِ سلب کرسا اوفتا استحصال ءِ کرینے اونا اخس کہ مذمت ءِ کننگے کم ءِ۔ اوپارے کہ 9 لکھ آن زیات بھارتی فوج کشمیر نا گلی محلہ غاتیٹی کشمیری تیا ظلم انا زی آ ظلم کننگ ءُ۔ مخلوق ءِ برمتہ کننگ انگ ءِ و بھلو کچ اسے ٹی کشمیریک بے گواہ مننگ ءُ۔ اوپارے کہ جہانی برادری کشمیری تا بارواٹ چپی ءِ پرغے و اقوام متحدہ نا قرارداد آتا رداٹ اوفتا حق خودارادیت ترفنگ کن تینا کڑد ءِ ادا کے۔ اوپارے کہ پاکستان نا حکومت مدام کشمیری ایڑھ ایلم تتون تفینے و آخیریکو ساہ اسکان تفسا کیک۔ اوبھارتی حکومت ءِ پارے کہ او کشمیری تا انسانی حق و اوفتا شخصی آجوئی ، احساس و جوزہ غاتا خیال ءِ تخے و پنچ اگست 2019 ء نا کشمیر نا جغرافیائی حیثیت ءِ بدل کننگ نا غیر آئینی گام گیج ءِ پدی ہلے۔ اوپارے کہ کشمیر نا آجوئی نا تحریک سلپک و اوفتا آجوئی نا تڑپ اٹی دے پہ دے ودکی مریک۔
