اسلام آباد۔ 02 اگست (اے پی پی) بنجائی وزیر حوالکاری و شینکاری مریم اورنگزیب ممنوعہ فنڈنگ کیس اٹ الیکشن کمیشن نا فیصلہ ءِ عمران خان نا ڈوہ انا پک گوندسا پارینے کہ دُز، دروغ تڑ و منی لانڈر آخر ہشت سال آن پد ہلنگا، عمران خان جہانی منی لانڈر پک مسنے، او صادق و امین اف، پارٹی چیئرمین نا عہدہ غان دمدستی استیفہ ایتے، عمران خان پاکستان نا برخلاف درملکی سازشی ڈٹ اس ئس و ارے۔ سے شنبے نادے آ تینا بیان اٹی بنجائی وزیر حوالکاری پارے کہ عمران خان دروغ تڑ و جعلساز اسے، اوڑآ الیکشن کمیشن مہر خلکونے۔ عمران خان اسرائیل، بھارت، امریکہ، کینیڈا تون اوار ایلو ملک آتیان ممنوعہ فنڈنگ ہلک۔ اوپارے کہ عمران خان غیر کانودی فنڈنگ اٹ پاکستان اٹ فتنہ برپاکرے۔ عمران خان 351 درملکی کمپنی و 34 درملکی تیان فنڈنگ ہلک و جعلی و دروغ انا بیان حلفی اس جمع کرفے۔ اوپارے کہ 13 غیرکانودی بینک اکاؤنٹ آتے عمران خان تینٹ چلیفسا کرے و اوفتے الیکشن کمیشن آن ڈکسا کرے، جہانی فراڈیک خیرات نا پن آ پیسہ جوڑ کریر و جعلسازی کریر۔ عمران خان رزاک اٹ تینا چار ملازم طاہر اقبال، محمد نعمان افضل، محمد ارشد و محمد رفیق نا پن آ پیسہ خوائفے۔ او پارے کہ دُز و منی لانڈر وکیل آتے بدل کرے، الیکشن کمیشن آن نرا و کیہی وار کیس ءِ توننگ کن پٹیشن دائر کرے۔ اوپارے کہ عمران خان جہانی منی لانڈر پک مسنے، بنجائی حکومت کانود نا رداٹ الیکشن کمیشن نا فیصلہ غا عملدرآمد کیک۔ اوپارے کہ عمران خان دا دزی نا سوب آن الیکشن کمیشن آ جلہو کننگ ءِ۔
