اسلام آباد۔ 02 اگست (اے پی پی) پاکستان تحریک انصاف نا برخلاف ممنوعہ فنڈنگ نا فیصلہ ءِ بنفنگا ہرانا رداٹ تحریک انصاف ءِ امریکہ، کینیڈا و ووٹن کرکٹ آن ملوک آ فنڈنگ ءِ ممنوعہ گوندنگانے ہراڑآ تحریک انصاف ءِ شوکاز نوٹس جاری کننگ نا فیصلہ کرسا تعلقدار کمامدار آتے پاننگاکہ او کانود نا رداٹ کارروائی نا بناءِ کری ہراٹی کیس ءِ بنجائی حکومت آ ہم گدریفنگ مریک۔ سے شنبے نادے آ چیف الیکشن کمشنر سکندر سلطان راجہ مسہ باسکی بنچ انا 70 پنہ غاتیا تالان امنائی فیصلہ ءِ بنفے۔ فیصلہ نا رداٹ تحریک انصاف نا چیئرمین نا کنڈآن 2008 آن 2013 اسکان پنچ سال اٹی جمع کرفوک آ فارم ون اسٹیٹ بینک پاکستان نا اسٹیٹمنٹ تون مطابقت تخپک و دانا نسبت غیر مستند ءِ، تحریک انصاف 34 درملکی کمپنی تیان فنڈنگ ہلکونے۔ تحریک انصاف نا 13 نادرست اکاؤنٹ مون آ بس ہرافتا او ریکارڈ ءِ تنگ کتو۔ فیصلہ ٹی پاننگانے کہ چیئرمین تحریک انصاف اکاؤنٹ آتے ڈکا، اکاؤنٹ آتے ڈکنگ آئین نا خلاف ورزی ءِ۔ پی ٹی آئی دانستہ وڑاٹ ووٹن کرکٹ لمیٹڈ آن ممنوعہ فنڈنگ دوئی کرے۔ پی ٹی آئی دانستہ وڑاٹ متحدہ عرب امارات نا کمپنی برسٹل انجینئرنگ آن ممنوعہ فنڈنگ دوئی کرے۔ سویٹزر لینڈ انا ای پیلینٹ ٹرسٹیز کمپنی، برطانیہ نا ایس ایس مارکیٹنگ کمپنی آن ممنوعہ فنڈنگ دوئی کرے۔ پی ٹی آئی یو ایس اے ایل ایل سی آن دوئی کروک فنڈنگ ہم ممنوعہ پک مس۔ الیکشن کمیشن نا فیصلہ نا رداٹ رومیتا سیٹھی آن ملوک آ فنڈنگ ہم غیرکانودی گوندنگا پی ٹی آئی ہرا اکاؤنٹ آتیان لاتعلقی پاش کرے او فتے اونا سینئر سرکڑدہ ملفیسس۔ کمیشن 351 درملکی کمپنی تیان ملوک آ فنڈنگ ءِ ہم غیرکانودی گوندا۔ فیصلہ ٹی پاننگاکہ دوئی ریکارڈ و شاہدی تا بنداو آ ممنوعہ فنڈنگ پک مریک۔ ہنداخاطرآن تحریک انصاف ءِ شوکاز نوٹس جاری کرے وخت اس کہ فیصلہ ٹی پاننگانے کہ انتئے کہ ممنوعہ فنڈنگ ءِ ضبط کننگے، کمیشن نا فیصلہ ءِ مون آ تخسا کانود نا رداٹ کارروائی تا بناءِ کننگ مریک۔ پی ٹی آئی نا دوئی کروک ممنوعہ فنڈنگ نا سرجم آتا رداٹ پی ٹی آئی کے مین آئی لینڈ اٹی رجسٹرڈ ووٹن کرکٹ کلب آن 21 لکھ 21 ہزار 500 امریکی ڈالر دوئی کرے۔ ووٹن کرکٹ کلب ابراج گروپ نا مالک عارف نقوی نا ملکیت ءِ۔ پی ٹی آئی متحدہ عرب امارات نا برسٹل انجینئرنگ آن 49 ہزار 965 امریکی ڈالر نا فنڈ ہلک۔ سوئٹزر لینڈ آن تعلق تخوک آ ای پلینٹ و برطانوی کمپنی ایس ایس مارکیٹنگ آن کل 10 لکھ اسہ ہزار 741 ڈالر دوئی کننگا۔ پاکستان تحریک انصاف امریکہ نا کمک اٹ 2 ایل ایل سی کمپنی تیان 25 لکھ 25 ہزار 500 ڈالر پی ٹی آئی پاکستان ءِ گدریفنگا۔ پی ٹی آئی کینیڈا کارپوریشن آن 2 لکھ 79 ہزار 822 ڈالر فنڈ منتقل مس۔ پی ٹی آئی یو کے پبلک لمیٹڈ کمپنی آن 7 لکھ 92 ہزار 265 برطانوی پاؤنڈز منتقل مس۔ پی ٹی آئی کینیڈا کارپوریشن آن 35 لکھ 81 ہزار 186 پاکستانی روپئی نا عطیہ ہم دوئی کننگا۔ پی ٹی آئی آسٹریلوی کمپنی ڈنپیک پرائیویٹ لمیٹڈ، انور برادرز ، زین کاٹن و ینگ اسپورٹس آن ہم فنڈنگ دوئی کرے۔
